Թուրքիայի գլխավոր շտաբը զավթել է իշխանությունը (թարմացվող, լուսանկարներ, տեսանյութ)

Թուրքիայի գլխավոր շտաբի զինվորականները հայտարարել են երկրում իշխանության զավթման մասին։ «ՌԻԱ Նովոստին»-ի հաղորդմամբ' նրանք հայտնել են երկրի ղեկավարության ձերբակալման մասին։

ԱՄՆ պետքարտուղար Ջոն Քերրին հայտարարել է, որ Թուրքիայում խաղաղության եւ կայունության հաստատման հույս ունի:

ՌԴ ԱԳ նախարար Սերգեյ Լավրովը հայտարարել է, որ Թուրքիայում պետք է խուսափել արյունահեղությունից, և բոլոր հարցերը պետք է լուծվեն սահմանադրության շրջանակներում։

Էրդողան. «Մեր ժողովրդին կոչ եմ անում դուրս գալ հրապարակներ օդանավակայաններ։ Եկեք ամբողջ ժողովրդով հավաքվենք հրապարակներում, օդանավակայաններում, իսկ դրանց փոքրամասնություն կազմող խումբը թող տանկերով գա, ինչ անում է ժողովրդին, այնտեղ անի։ Մթնոլորտը շատ խճճված է։ Նման մթնոլորտ ստեղծողները շատ թանկ կվճարեն»:

Անկարայի քաղաքապետը կոչ է արել քաղաքի բնակիչներին փողոցներ դուրս գալ։

Թուրքիայի մայրաքաղաք Անկարայում լսվում են կրակոցներ, քաղաքի երկնքով ռազմական օդանավեր եւ ուղղաթիռներ են թռչում, վիճակն անկայուն է: Այս մասին հաղորդում է Ռիա Նովստի լրատվականը:

Երթևեկության համար փակ է նաև Ստամբուլում Բոսֆորի և Սուլթան Մեհմեթ կամուրջները:

Երկրի վարչապետ Բինալի Յըլդըրըմը հայտարարել է, որ Թուրքիայում ռազմական հեղաշրջման փորձ է կատարվել։ Տեղեկացվում է, որ ռազմական ուղղաթիռներից մեկը կրակ է բացել ազգային հետախուզական ծառայության շենքի ուղղությամբ։

Արգելափակվել են Twitter, Facebook սոցիալական ցանցերն ու YouTube-ը:

Հաղորդվել է նաև Ստամբուլի Աթաթուրքի անվան օդանավակայանի փակման մասին:

Որոշ տեղեկություններով` Թուրքիայի զինված ուժերի գլխավոր շտաբի պետ Հուլուսի Աքարը գերի է վերցված:

Պետական TRT հեռուստաընկերությունը գրավվել է և ընթերցվել հեղաշրջումն իրականացնողների հայտարարությունը:

Թուրքագետ Լևոն Հովսեփյանը ֆեյսբուքյան իր էջում գրել է.

Այս պահին բավական լարված իրավիճակ է Ստամբուլում և Անկարայում: Ստամբուլում Բոսֆորի և Սուլթան Մեհմեթ կամուրջները զինծառայողների ու անվտանգության ուժերի կողմից փակվել են, զինվորականներ ու անվտանգության ուժեր են տեղակայվել քաղաքի մի քանի հատվածներում: Անկարայում անվտանգության մարմինների կողմից շրջափակվել է գլխավոր շտաբի շենքը, տեղակայվել են մեծ թվով շտապօգնության մեքենաներ: Նույնիսկ օդային տեխնիկա է թռչում այս պահին Անկարայի վրայով, պետական հաստատության շենքերը ուժեղացված բանակային հսկողության տակ են: Անկարայի վրայով բավական ցածր թռիչքներ են իրականացնում ռազմական ինքնաթիռներն ու ուղղաթիռները: Մամուլում և սոցցանցերում որոշակի խուճապ ու անհանգստություն կա, քանի որ որևէ պաշտոնական հայտարարություն չի արվում:

Թուրքիայի զինված ուժերի գլխավոր շտաբը հայտարարեց, որ իշխանությունն իր ձեռքն է վերցնում: Թուրքիայում հերթական ռազմական հեղաշրջումը: