«Հրապարակ». Կոալիցիայի մասին պայմանավորվածությունը արդեն կայացել է

Ընտրություններն ավարտվեցին, հիմա եկել է ամենահաճելի պահը, երբ պետք է կիսել պաշտոնները: Ինչպես հայտնի է, Հայաստանում ավանդույթ է ձևավորվել պաշտոնները կիսել կոալիցիոն սկզբունքով, որպեսզի բոլորին մի բան հասնի, ու դժգոհողների քանակը հնարավորինս փոքր լինի:

Թերթին հայտնի է դարձել, որ արդեն այսօր հնարավոր է, որ հայտարարվի կոալիցիայի ստեղծման մասին: ՀՀԿ նախագահ Սերժ Սարգսյանն ու ԲՀԿ նախագահ Գագիկ Ծառուկյանը սկզբունքորեն պայմանավորվել են կոալիցիայի շուրջ, մնում է միայն մի քանի դետալներ ճշտել:

ԲՀԿ ղեկավար Գագիկ Ծառուկյանի թիմի որոշ ներկայացուցիչներ ընտրություններից հետո հանդես եկան խիստ սկզբունքային դիրքերից և մերժեցին կոալիցիա կազմելու հնարավորությունը: Դե, այդ մարդկանց կարելի է հասկանալ, ընտրությունների վրա միլիոններն իրենք չեն ծախսել, իրենք չէ, որ պետք է այդ փողը հետ բերելու մասին մտածեն: Ինչ-որ մարդիկ մտածեցին, որ դա գին բարձրացնելու համար է արվում: ԲՀԿ-ի գինն ինքնին բարձրացել է, և դա անհնար է ժխտել: Ի տարբերություն նախորդ խորհրդարանի, այս խորհրդարանում ԲՀԿ-ն ունի 10 պատգամավոր ավելի: Հենց այդ տրամաբանության շրջանակներում է, որ ՀՀԿ-ն այս անգամ պահանջում է ավելի մեծ ներգրավվածություն կառավարությունում:

Դեռևս գործող կառավարությունում ԲՀԿ-ն ունի նախարարական չորս պորտֆել, այս անգամ նա պահանջում է ևս երկուսը: ԲՀԿ-ականներն աչք են դրել կապի և տրանսպորտի նախարարության վրա, որը ֆորմալ առումով պատկանում է ՕԵԿ-ին: Եվ քանի որ ՕԵԿ-ն այս ընտրություններում ավելի քիչ ձայն է ստացել, քան նախորդ անգամ, և կարող է զիջել այս տեղը ԲՀԿ-ին:

ԲՀԿ-ականներն աչք ունեն նաև բնապահպանության նախարարության վրա: Նախկին ՕԵԿ-ական, այժմ ՀՀԿ-ական նախարար Արամ Հարությունյանը բավական երկար պաշտոնավարեց, և նրան կարելի է հանգիստ խղճով վաստակած հանգստի ուղարկել: Հնարավոր է, որ ԲՀԿ-ն առողջապահության նախարարի պորտֆելը փոխանակի կրթության և գիտության նախարարի պաշտոնի հետ, և ՀՀԿ-ական Աշոտյանը մի քիչ էլ աշխատի ըստ մասնագիտության:

Եթե ԲՀԿ-ի ներգրավվածությունը գործադիր իշխանությունում մեծանա, կմեծանա նաև պատասխանատվությունը, որ կկրի ԲՀԿ-ն կառավարության գործունեության համար և ավելի քիչ հնարավորություն կունենա ընդդիմադիր ելույթներ ունենալ և բողոքել հանրապետական կառավարության գործունեության աղետալի արդյունքներից և հետևանքներից:

ՀՀԿ-ԲՀԿ պայմանավորվածությունների ոլորտում է նաև Աժ-ն և նրա ղեկավար կազմը: Աժ նախագահ կընտրվի Հովիկ Աբրահամյանը, ով Աժ նախագահի պաշտոնը ժամանակավորապես լքել էր ՀՀԿ նախընտրական շտաբը ղեկավարելու համար: ՀՀԿ-ն ընտրություններում գերազանցեց այն ցուցանիշը, որը նախապես սահմանվել էր: Այնպես որ Աբրահամյանը կարող է հաղթականորեն վերադառնալ ելման դիրքեր: Բացի դա, Աբրահամյանը կարող է համակարգել ՀՀԿ և ԲՀԿ խորհրդարանական խմբակցությունների համատեղ աշխատանքը, քանի որ հավասարապես ընդունելի կերպար է երկու խմբակցությունները ներկայացնող պատգամավորների համար:

Բայց այս պայմանավորվածությունների ամենակարևոր կետը թերևս կլինի այն, որ ԲՀԿ ղեկավար Գագիկ Ծառուկյանի բառապաշարում պետք է բացառվի «Այդ մասին՝ հաջորդ դասին» արտահայտության գործածումը: Իսկ դա նշանակում է, որ երբ նրան հարցնեն, թե նախագահական ընտրություններում ում է պաշտպանելու ԲՀԿ-ն, նա չի մտածի, որ այդ օրվա դասի թեման չէ, որ այդ հարցին պատասխանելու համար պետք է պատրաստվել, և միանգամից կասի, որ ԲՀԿ-ն սատարելու է նախագահ Սերժ Սարգսյանին: Հանրապետականները հոգնել են նման խաղերից և ուզում են, որ առևտրային պայմանագրում ամեն ինչ հստակ լինի:

Ահա այսպիսի երջանիկ ավարտ: Բոլորը կուշտ կլինեն ու երջանիկ՝ մի քանի բացառություններով: Միակ դժգոհողը հայ հասարակությունը կարող է լինել, բայց ՀՀԿ-ականներն ու ԲՀԿ-ականները նախապես և համատեղ ուժերով գնել են մեր երջանիկ լինելու իրավունքը: