Հայ ընտանիքում ներդնել եվրոպական մոդելը՝ ճիշտ չէ. Տեր Բաբկեն

Հայ ընտանիքը գտնվում է խորը ճգնաժամի մեջ, շատացել են ամուսնալուծությունները, թուլացել է ընտանիքը: Այս մասին այսօր լրագրողների հետ հանդիպմանն ասաց «Իրավաբանների և հոգեբանների միջազգային ասոցիացիա» ՀԿ նախագահ Խաչատուր Մարոզյանը, և ուշադրությունը հրավիրեց երեխաներին և սերնդափոխությանը:

Խաչատուր Մարոզյանը նշեց, որ իրենք նորընտիր Ազգային Ժողովին նոր առաջարկություն են պատրաստել: Առաջարկն ընտանիքի զարգացման ռազմավարության մասին է: Նա նշեց, որ իրենց հիմնական նպատակն է ունենալ ընտանիք-դպրոց, որը ներկայացնում է կնոջ և տղամարդու դերակատարությունը ընտանիքում:

«Մենք հաճախ ցույց ենք տալիս, որ շատ գրագետ ենք և բազմիմաց մեր ընտանիքներում, բայց փորձը ցույց է տալիս, որ դա այդպես չէ: Հիմնականում լինում են տարրական խնդիրներ, էլ չանդրադառնանք «սիրահարվել, սիրել, ամուսնանալ»-ուն և այլն, նրան, որ տղամարդը չի կարողանում հասկանալ կնոջ ֆիզիոլոգիան»,- ասաց Մարոզյանը:

Ասուլիսի մյուս բանախոս Արաբկիր համայնքի հոգևոր հովիվ Տեր Բաբկեն քահանա Հայրապետյանն իր հերթին նշեց, որ ամուսնալուծությունների հիմքում հոգևոր պատասխանատվության խնդիր կա, պետք է կրթել երիտասարդներին, բացատրել արժեքային համակարգը: Նրա խոսքերով, ընտանիքի մոդելը ի սկզբանե դրվել է դրախտում, իսկ պսակի խորհուրդը աստավածադիր է:

Տեր Բաբկենը անդրադառնալով ընտանիքում կնոջ և տղամարդու դերերին՝ ասաց. «Տղամարդու խնդիրը ընտանիքում այն է, որ նա տիրություն անի իր ընտանիքին, սիրի իր կնոջը և պաշտպանի իր ընտանիքին, իսկ կնոջ դերը, որ հեզությամբ քաղցրացնի իր տունը, սիրի իր ամուսնուն, կրթի իր զավակներին և բարձրացնի իր ընտանիքի պատիվը»: Նրա խոսքերով, այս ամենի մեջ ներդնել եվրոպական մոդելը ճիշտ չէ:

«Մենք մեր ընտանիքները պետք է աչքի լույսի պես պահենք: Դա պետության առաջին խնդիրներից մեկն է»,- ասաց նա, և հավելե, որ պետությունը պետք է հոգա այն մասին, որ երիտասարդ, նորաստեղծ ընտանիքները կարողանան ամրապնդվել:

Անդրադառնալով ամուսնալուծությունների թեմային, քահանան նշեց, որ մեր ընտանիքի տեսակը պահպանվում է, բայց ցավոք արտագնա աշխատանքների պատճառով ընտանքիները այլասերվում և քանդվում են:

«Իբրև թե ռուսականը կամ եվրոպականը ավելի առաջադեմ են, քան մեր նահապետական ընտանիքը, որը իրոք երջանկության մեծ աղբյուր է»,- նշեց քահանան և հավելեց, որ «ընտանիքը հավիտենական է, ընտանիքը փրկության օջախ է»: