Թուրքիայում գյուլենականներին հարելու մեղադրանքով Գերմանիայի քաղաքացի է ձերբակալվել

Թուրքիայում ձերբակալվել է Գերմանիայի կին քաղաքացի, ով մեղադրվում է չափավոր իսլամական քարոզիչ Ֆեթուլլահ Գյուլենի ղեկավարած շարժմանը հարելու մեջ: Ինչպես հաղորդում է «Արմենպրես»-ը, այս մասին տեղեկացրել է գերմանական Suddeutsche Zeitung պարբերականը:< /p>

Գերմանացու տանը հայտնաբերել են գրքեր, որոնք թուրքական հետաքննող մարմինները կասկածելի են համարել: Այլ մանրամասներ կնոջից չեն հաղորդվել: Պարբերականի տվյալներով' Գերմանիայի դեսպանությունը քանի օր է' փորձում է կապվել քաղաքացու հետ, սակայն դիվանագետներին դեռևս չի հաջողվել հանդիպել նրան:

Թուրքիայում հուլիսի 15-ին տեղի ունեցած ռազմական հեղաշրջման փորձից հետո երկրում ձերբակալվել է մոտ 26 հազար մարդ: Ներկայում կալանավորված են 13 419 կասկածյալ, 74562 քաղաքացու անձնագիր չեղյալ է հայտարարվել: Մոտ 60 հազար մարդ պաշտոնից հեռացվել է չափավոր իսլամի թուրք քարոզիչ Ֆեթուլլահ Գյուլենի շարժմանը հարելու կասկածանքով:

Պաշտոնական Անկարան հենց Գյուլենին է մեղադրում հուլիսի 15-ին տեղի ունեցած ռազմական հեղաշրջման փորձ կազմակերպելու մեջ:

Շուրջ 20 տարի է, ինչ Գյուլենը բնակվում է ԱՄՆ-ում, սակայն որոշակի ազդեցություն է պահպանում հայրենիքում: 74-ամյա գործիչը նախկինում Էրդողանին օգնել էր գալ իշխանության, բայց ժամանակի ընթացքում երկրի ղեկավարման հարցում նրանց մոտեցումները բաժանվել են:

Էրդողանը Գյուլենին մեղադրում է պետական հեղաշրջման փորձի և բարձրաստիճան պետծառայողների հեռախոսային խոսակցությունները զանգվածաբար լսելու գործը կազմակերպելու մեջ, որոնց մի մասի վերծանումն օգտագործվել է 2013 թվականի դեկտեմբերի 17-25-ին Թուրքիայում Էրդողանի որդու, դստեր, փեսայի և կառավարության 4 անդամների մասնակցությամբ մեծածավալ կոռուպցիոն գործողությունների բացահայտման համար: Էրդողանը հայտարարել էր, որ դրա հետևում կանգնած են ԱՄՆ-ում վտարանդի Ֆեթուլլահ Գյուլենի հետևորդները, որոնք ցանկանում են տապալել իր կառավարությունը: Էրդողանի հանձնարարությամբ աշխատանքից հեռացվել կամ ձերբակալվել են այդ կոռուպցիոն սկանդալը բացահայտած հազարից ավելի փաստաբաններ, դատախազության և ոստիկանության աշխատակիցներ: