Եթե հանձնեն հողերը, այդ դեպքում Եռաբլուրը ի՞նչ պետք է անենք. Արտավազդ Բայաթյան

Երգահան Արտավազդ Բայաթյանը՝ խոսելով իր ընկերոջ՝ Եղիշե Պետրոսյանի մասին ասաց, որ Պետրոսյանը գտնվում է հիվանդանոցում և նախաինսուլտային բավականին լուրջ վիճակ է: Եղիշեն վիրահատություն տարած էր և վերջին օրերի տարած ամբողջ սթրեսը նրա վրա շատ է ազդել:

ԼՈւՐԵՐ.com-ի տեղեկացմամբ՝ Արտավազդ Բայաթյանը ծիծաղելի է համարում այն փաստը, որ միանգամից երկու ոստիկան է գտնվել ովքեր գրել են, թե Եղիշե Պետրոսյանը մեգաֆոնը ձեռքին Սարի թաղում անկարգությունների կոչ է արել: «Ծիծաղելի բան է, որովհետև նա վատացել էր և նրան արդեն տարել էին՝ չհասնելով Սարի թաղ: Մինչ օրս նա հիվանդանոցում է, եթե չգիտեք ասեմ»,- ասաց Բայաթյանը՝ շեշտելով, որ իր ընկերն ունի քաղաքական իր դիրքորոշումները, իր մոտեցումները, անկաշառ է ու ցավ է ապրում այն վիճակի համար, որ տիրում է մեր հայրենիքում: 

«Մեծ մտահոգություն ունեմ, դուք պատկերացնո՞ւմ եք այն մարդու վիճակը, ում կողքին հարազատներ ընդհանրապես չկան, ինչքան գործ կկարեն գլխին ու կտանեն, ընդհանրապես կպահեն: Պատկերացրեք՝ ինչքան անպաշտպան են մեր քաղաքացիները»,- այսպես իր մտահոգությունն արտահայտեց երգահանը, և հավելեց. «Անընդհատ բացատրում են, թե ինչքան սովորողներ ունենք, կրթական լավ համակարգ ունենք՝ բա այսքան անկիրթ բռի մարդիկ մեզ որտեղի՞ց , այդքան լավ բուժցանց ունենք` բա այսքան հիվանդ մարդ մեզ որտեղի՞ց: Ասում ենք՝ քրիստոնյա ազգ ենք, պատարագներ ենք մատուցում, առ Աստված աղոթք ենք անում՝ բա այսքան սադիստ մեզ որտեղի՞ց»:

Երգահանի խոսքով՝ վերջին օրերին տեղի ունեցած հանրահավաքների ու երթերի ժամանակ մարդիկ գնում էին հերոսների հետևից, հետո պետությունն ասում է, թե այդ հերոսները տեռորիստ էին, իսկ հերոսները Եռաբլուրում են. «Այսինքն, ամենալավ հերոսը մեռած հերո՞սն է: Ստացվում է այսպես, եթե հանձնեն հողերը, այդ դեպքում Եռաբլուրը ի՞նչ պետք է անենք»: