Գյումրիում ոչ ոք չի կարող իր լծակներն օգտագործել այլ արդյունք ստանալու համար. ԲՀԿ-ական թեկնածու

Մինչև ընտրություններ իմ շանսերը չեմ կարող գնահատել, դա պատվաբեր գործ չի: Այս մասին Lurer.com-ի հետ զրույցում ասաց ԲՀԿ անդամ, Գյումրու քաղաքապետի թեկնածու Վարդևան Գրիգորյանը:

«Հույս ունենք, որ առաջիկա ընտրությունները կանցնեն թափանցիկ, ազնիվ: Այդ ամենը պայմանավորված կլինի միայն օրենքով, և ոչ ոք իր լծակները չի կարող օգտագործել այլ արդյունք ստանալու համար»,-ասաց Վ. Գրիգորյանը:

Նշենք, որ սեպտեմբերին կայանալիք ՏԻՄ ընտրությունների ժամանակ, հանրապետության երկրորդ քաղաքում՝ Գյումրիում, քաղաքացիները կընտրեն քաղաքապետ: Գյումրու քաղաքապետ վերընտրվելու հայտ է ներկայացրել գործող քաղաքապետ Սամվել Բալասանյանը, ՀՅԴ անդամ Աշոտ Կուրղինյանը, իսկ այսօր հայտնի դարձավ նաև 3-րդ թեկնածուն՝ ԲՀԿ անդամ Վարդևան Գրիգորյանը, ով, ի դեպ, նախկինում զբաղեցնում էր Գյումրու պետական մանկավարժական համալսարանի ռեկտորի պաշտոնը:

Վարդևան Գրիգորյանը հույս ունի, որ ԲՀԿ-ի աջակցությունը կարող է օգնել իրեն, որպեսզի ընտրվի քաղաքապետ:
Հարցին, թե ԲՀԿ-ն շատ չի թուլացրել իր դիրքերը, որպեսզի կարողա օգնել իրեն, Գրիգորյանն ասաց.
«Անցկացված սոցհարցումների արդյունքում ԲՀԿ-ն միշտ քաղաքական դաշտում զբաղեցնում է 2-րդ տեղը: Հանրապետության քաղաքական դաշտում 2-րդ տեղը զբաղեցնելը խոսում է լուրջ ռեսուրսի մասին»:

Վարդևան Գրիգորյանը տրամադրված է մարտական, և նշում է, որ ինքը գնում է դեպի հաղթանակ և վստահ է իր ուժերի վրա: