«Հանուն խոսքի ազատության» ստորագրահավաքին միացան նաև «02» շաբաթաթերթի աշխատակիցները

Այսօր` օգոստոսի 10-ին, Ազատության հրապարակում բողոքի ակցիա և ստորագրահավաք էին կազմակերպել լրագրողները:

ԶԼՄ ներկայացուցիչները պահանջում էին քրեական պատասխանատվության ենթարկել հուլիսի 29-ին Սարի թաղում լրագրողների նկատմամբ ոստիկանական բռնություններ գործած անձանց:

ԼՈւՐԵՐ.com-ի տեղեկացմամբ` ակցիային ներկա էին ոչ միայն լրագրողներ, խմբագիրներ այլ նաև պատգամավորներ` Նաիրա Զոհրաբյանը, Վահե Էնֆիաջյանը, Նիկոլ Փաշինյանը, Սամվել Ֆարմանյանը, «Հայազն» կուսակցության ներկայացուցիչները, կրթության փորձագետ Անահիտ Բախշյանը, ազատամարտիկ Մուշեղ Սաղաթելյանը, պետական կառույցների մամուլի խոսնակներ` ՄԻՊ խոսնակ Զոհրաբ Եգանյանը, ոստիկանության լրատվական ծառայության պետ Աշոտ Ահարոնյանը և այլք:

Հետաքրքրական էր այն հանգամանքը, որ ստորագրահավաքին միացան նաև ոստիկանության լրատվական ծառայության «02» շաբաթաթերթի աշխատակիցները:

Լրագրողների հետ զրույցում՝ մեկնաբանելով այս հանգամանքը, պատգամավոր Նիկոլ Փաշինյանը, ով նաև երկար տարի լրագրության դաշտում է աշխատել, ասաց, որ ակցիայի կազմակերպիչները պետք է վերաբերմունք արտահայտեն. «եթե մենք ստորագրում ենք պարզապես ստորագրելու համար դա վատ է, բայց եթե ստորագրության մեջ դնում ենք կոնկրետ բովանդակություն դա արդեն այլ բան է: Եթե «02» թերթում գրվեր, որ այդ ակցիաներին մասնակցել են ոստիկանության պետի թիկնազորի երկու ամենահայտնի անդամները և նրանց ներգրավմամբ է նաև կրիմինալը մասնակցել այդ պրոցեսներին, գուցե հասկանալի կլիներ: «02»-ի համար ավելի ճշգրիտ քայլ կլիներ այդ օրվա իրադարձությունների ճշգրիտ լուսաբանումը, դա ավելի խոսուն կլիներ քան ստորագրությունը»,- ասաց Փաշինյանը:

Ազատության հրապարակում mediamax.am կայքի գլխավոր խմբագիր Դավիթ Ալավերդյանը ընթերցեց «Հանուն խոսքի ազատության» բողոքի ակցիայի շրջանակներում բարձրացվող պահանջներին վերաբերող տեքստը, որը տեսանյութով ներկայացնում ենք ստորև.