Երբ զարմանում է վարչապետը

Օգոստոսի 18-ն էր: Սովորական մի օր: Կառավարության սովորական նիստ: Միալար քննարկում, որոշումների ընդունում ու վերջ:
Մեր Կառավարության նիստերը անցնում են գրեթե միշտ միապաղաղ ու անասելիք՝ օրակարգի հարցերը գրեթե չեն քննարկվում, վարչապետը գրեթե լուռ է:

Սակայն կան բացառություններ, որից մեկն էլ հենց այդ 18-ին եղավ…

ՀՀ կառավարությունն Արդարադատության նախարարությանը հատկացրեց 18 հազար 225 եվրոյին համարժեք դրամ՝ Մարդու իրավունքների եվրոպական դատարանի՝ «Սիմոնյանն ընդդեմ Հայաստանի» գործով 2016 թվականի ապրիլի 7-ի վճռի պահանջները կատարելու նպատակով:

Կասեք հա, ի՞նչ: Հատկապես վերջերս նման հատկացումներ հաճախ են լինում, հատկապես վերջերս շատացել են ՄԻԵԴ դիմած ու հաղթանակած անձանց թիվը:

Դա նկատել ենք բոլորս, դա նկատել է նաև վարչապետը, ում աչքի առաջ է բյուջեն հալումաշ եղել, ում աչքի առաջ է այդ վտիտ բյուջեից գումարներ պոկվել ու դատական պահանջները կատարվել…

Փաստը զայրացրել է վարչապետին: Մեջբերեմ նիստից.

«ՀՀ վարչապետ Հովիկ Աբրահամյանը հանձնարարել է հաշվարկել, թե վերջին երեք տարվա ընթացքում որքան գումար է հատկացվել ՄԻԵԴ-ի վճիռների համար»։

«Եվ ընդհանրապես այս սխալ որոշումների համար ինչ-որ մեկը պետք է պատասխան տա՞, թե՝ ոչ: Հանձնարարում եմ Ֆինանսների նախարարությանն ու Կառավարության աշխատակազմին քննարկել, թե որքան գումար ենք հատկացրել ՄԻԵԴ-ի որոշումների համար 2014-2015 թվականների և այս տարվա ութ ամիսների ընթացքում»,- ասել է ՀՀ վարչապետը:

Ո՞վ է պատասխան տալու, պարոն վարչապետ: Դուք լուրջ ե՞ք խոսում, Դուք լուրջ ե՞ք նման հարց բարձրացնում ու պատասխան պահանջում: Մի բան ասեմ, հանկարծ արմանք-զարմանք չապրեք՝ հայկական դատական համակարգը Ձեր հսկողության տակ է, այն նախագահականի հսկողության տակ է…

Քանի-քանի գործեր եք փորձել կոծկել Հայաստանում, քանի-քանի վարույթներ չեն ընդունվել Վարչական դատարանում, քանի՞ դեպքի մասին խոսենք:

Շատ են՝ գիտեմ ու գիտեք ու գիտենք:

Մի վատ բան էլ կա:

Այսօրվա վճարած գումարները վերջը չեն: Դեռ էլի ենք վճարելու, դեռ շատ ենք վճարելու:

Հիշու՞մ եք Մատաղիսի դատավարությունը, որ տարիներ ձգվեց ու միլիոններ տարավ ձեզանից: Նրա նման էլի դեպքեր կան:

Եվրոպականում ամուր դիրքավորված են, ու շատ շուտով նրանց ձայնն էլ կլսենք:

Կլսենք նաև հուլիսի 17-ի դեպքերից հետո տուժած քաղաքացիների ձայնը, ովքեր արդեն իսկ պատրաստում են դիմել Եվրոպական դատարան:

Այդ ուղին են բռնելու նաև Ավետիսյանների հարազատները…

Շատերն են այդ ուղին բռնելու:

Պարոն վարչապետ, պինդ կացեք:

Անի Սահակյան