Թուրքիան սպառնացել է Իրանին

Իրանը պետք է լուրջ հետևություններ կատարի իր միջուկային ծրագրի իրականացման առումով, եթե ցանկանում է խուսափել Իսրայելի հարձակումից։ Պաշտոնական Թեհրանին նման նախազգուշացում է կատարել Թուրքիայի ղեկավարությունը, հաղորդում է Росбалт–ը։

Եվ նման հայտարարությունն արվում է այն դեպքում, երբ Իրանը համաձայնել է բանակցել արևմտյան տերությունների հետ՝ միջուկային ծրագրի հետագա կիրառման շուրջ։ Բանակցությունների հերթական փուլը կվերսկսվի Բաղդադում՝ հաջորդ շաբաթ, սակայն Թուրքիայի իշխանություններն իրենց համոզմունքն են հայտնել, որ Իրանը պարզապես ժամանակ է շահում, այլ ոչ թե փորձում է խնդրի լուծումներ գտնել։

Ինչպես գրում է «Maariv» թերթը, վկայակոչելով եվրոպական դիվանագետներին, Թուրքիան այդպիսով փորձում է առավելագույն ճնշում գործադրել Իրանի վրա՝ պարտադրելով ՄԱԿ–ի Անվտանգության խորհրդի պահանջների կատարում։ Բացի այդ, Անկարան ավելի վաղ զգուշացրել էր, որ արևմտյան տերությունները կարող են խստացնել պատժամիջոցները Իրանի նկատմամբ, եթե Թեհրանը համառի և չհամաձայնի կատարել նրանց պահանջները։

Հիշեցնենք, որ մայիսի 23-ին կվերսկսվի Իրանի և «6-յակի»՝ արևմտյան տերությունների հետ բանակցությունները, միջուկային ծրագրի հետագա ճակատագրի շուրջ։ Առաջին փուլը տեղի էր ունեցել ապրիլին՝ Ստամբուլում, որից հետո արևմտյան երկրներն ակտիվորեն սկսել էին մշակել միասնական դիրքորոշում։