Քննարկվեցին հայ-շվեյցարական համագործակցության հարցեր

ՀՀ փոխվարչապետ, տարածքային կառավարման նախարար Արմեն Գեւորգյանն այսօր ընդունեց Հայաստանում Շվեյցարիայի Համադաշնության արտակարգ եւ լիազոր դեսպան Կոնստանտին Օբոլենսկուն:

Զրուցակիցները քննարկեցին երկկողմ համագործակցության հարցեր: Փոխվարչապետը նշեց, որ ՀՀ կառավարությունը կարեւորում է Շվեյցարիայի կառավարության աջակցությամբ Հայաստանում իրականացվող ծրագրերը եւ գոհունակություն հայտնեց արդյունավետ համագործակցության համար:

Արձանագրվեց, որ հաջողությամբ է ընթանում Շվեյցարիայի զարգացման ու համագործակցության գործակալության համաֆինանսավորմամբ Գորիսում իրականացվող սոցիալական բնակարանաշինության ծրագիրը, որը կավարտվի ամռանը, եւ 20 շահառու ընտանիք տանիք կունենա:

Երկուստեք կարեւորվեցին Սյունիքի մարզում իրականացվող գյուղական համայնքների եւ անասնապահության զարգացման ծրագրերը, որոնց նպատակը ֆերմերային տնտեսություններին աջակցելն է, նրանց համար կայուն եկամտի հնարավորությունների ստեղծումը:

Զրուցակիցներն անդրադարձան նաեւ հետագա համագործակցության ուղղություններին: Դեսպանը նշեց, որ Շվեյցարիան մտադիր է մասնավորապես շարունակել ֆերմերային տնտեսությունների աջակցության ծրագրերը:

Փոխվարչապետը շնորհակալություն հայտնեց նման պատրաստակամության համար՝ նշելով, որ գյուղական տարածքների զարգացման խնդիրը կառավարության առաջնահերթությունների շարքում է: