Անգլիայի Բանկը պատրաստվում է եվրոգոտու քայքայմանը

Անգլիայի Բանկի ղեկավար Մերվին Քինքը եվրոգոտու հնարավոր քայքայումը համարում է Մեծ Բրիտանիայի տնտեսության վերականգնման ամենամեծ սպառնալիքը։ Նրա խոսերով, բրիտանական տնտեսության վնասը երկրի հիմնական առևտրային գործընկերոջ քայքայման պարագայում գնահատել անհնարին է։ Այնուամենայնիվ, Անգլիայի Բանկում անում են հնարավորը`վատթարագույն սցենարին պատրաստ լինելու համար։ 

«Արտակարգ ծրագրերը քննարկվում են երկարաժամկետ կտրվածքի համար»,- ընդգծել է բանկի ղեկավարը` հավելելով, որ քննարկումներին մասնակցում են նաև Մեծ Բրիտանիայի ֆինանսների նախարարության ներկայացուցիչներն ու Ֆինանսական կարգավորման և վերահսկման վարչության աշխատակիցները։ 

Ավելի վաղ միջազգային Moody's վարկանշային գործակալությունը չէր բացառել եվրոգոտու քայքայման հնարավորությունը` հայտարարելով, որ այն կարող են լքել միաժամանակ մի քանի խնդրահարույց պետություններ, ինչպես, օրինակ, Հունաստանը։ 

Հիշեցնենք, որ մայիսի 6-ին կայացած ընտրություններում հունական ոչ մի կուսակցություն չի կարողացել ընտրողների մեծամասնության ձայները ստանալ, իսկ կոալիցիոն կառավարության ձևավորման շուրջ բանակցությունները դադարեցվել են։ Հունաստանի նախագահ Կարոլոս Պապուլիասը ձևավորել է այսպես կոչված «ծառայողական» կառավարություն, որը պետությունը կղեկավարի 30 օր` մինչ նոր, արտահերթ ընտրությունները, որոնք տեղի կունենան հունիսի 17-ին։ 

Մինչ այդ, Եվրամիության և Եվրոպական բանկի մի քանի ներկայացուցիչներ չեն դադարում կրկնել, որ Աթենքը նոր ֆինանսական օգնություն չի ստանա, եթե բարեփոխումներ չիրականացնի և չկրճատի պետական ապարատի ծախսերը: Ինչպես նշում են վերլուծաբանները, եվրոգոտուն Հունաստանի անդամակցության դադարեցման հավանականությունը մեծանում է: 

Այնուամենայնիվ, նախօրեին Ֆրանսիայի նախագահ Ֆրանսուա Օլանդը և Գերմանիայի կանցլե Անգելա Մերկելը բանակցությունների ժամանակ հայտարարել են, որ Հունաստանը չպետք է լքի եվրոգոտին: 

«Մենք համարում ենք, որ Հունաստանը պետք է մնա եվրոգոտու կազմում: Նման կածիքի է նաև Հունաստանի քաղաքացիների մեծ մասը»,- ասել է Մերկելը՝ հավելելով, որ Ֆրանսիան ու Գերմանիան կանեն հնարավորը՝ Հունաստանին օգնելու համար: 

Իր հերթին, Օլանդը հույս է հայտնել, որ հուլիսին կայանալիք խորհրդարանական ընտրությունների ժամանակ հույները կպաշտպանեն եվրոգոտու կազմում մնալու կուրսը: Նախագահը խոստացել է, որ Եվրոպան կաջակցի այդ մոտեցմանը: