«Մենք ենք, մեր Արցախը» մանկապատանեկան մարզային մշակույթի օրեր` մայրաքաղաքում

Ս. թ. մայիսի 16-18-ը, Երևանում, 2012 թ. մշակութային միջոցառումների ծրագրով նախատեսված՝ իրականացվում է «Մենք ենք, մեր Արցախը» խորագրով մանկապատանեկան մարզային մշակույթի օրերի նախագիծը, որին այս անգամ մասնակցում են ԼՂՀ-ի՝ Ստեփանակերտի, Հադրութի, Մարտունու, Ասկերանի, Շուշիի, Քաշաթաղի մանակապատանեկան ստեղծագործական համույթները, նկարիչներն ու անհատ կատարողները՝ թվով 40 երեխա:

«Առնո Բաբաջանյան» համերգասրահի ճեմասրահում մայիսի 17-ին՝ ժամը 17.30-ին կբացվի գեղանկարչական ցուցահանդես: Կցուցադրվեն արվեստի և գեղարվեստի դպրոցների սաների 20 լավագույն նկարչական և դեկորատիվ կիրառական աշխատանքները: Ժամը 18.00-ին՝ «Առնո Բաբաջանյան» համերգասրահում տեղի կունենա համերգ, որին կմասնակցեն Արցախի երաժշտական, արվեստի, հանրակրթական դպրոցների, երաժշտական քոլեջի, վարժարանի, մանկական ստեղծագործական կենտրոնների պատանի երաժիշտ-կատարողները, պարային համույթները:

Մարզից ժամանած երեխաներն իրենց մայրաքաղաքային ուղևորությունը կավարտեն երևանյան էքսկուրսիայով:

«Մենք ենք, մեր մարզը» խորագրով ծրագիրը մեկնարկել է 2008 թ. և միտված է ՀՀ մշակույթի նախարարության կողմից ՀՀ մարզերում նպատակային մշակութային քաղաքականության իրականացմանը, հաշվետու ստուգատեսերի միջոցով հանրապետության քաղաքներում մշակութային կյանքի աշխուժացմանը, խթանմանն ու զարգացմանը, մայրաքաղաքի բնակչության իրազեկվածությանը յուրաքանչյուր մարզի մշակութային ձեռքբերումներին:

2008-2012 թ.թ. ընթացքում ծրագրին մասնակցել են ՀՀ Շիրակի, Լոռու, Գեղարքունիքի, Կոտայքի, Տավուշի, Արարատի, Վայոց ձորի և Արմավիրի մարզերի մանակապատանեկան ստեղծագործական համույթները, նկարիչներն ու անհատ կատարողները: Միջոցառումների, ցուցահանդեսների, համերգների կազմակերպմամբ նպաստավոր պայմաններ է ստեղծվում մանկապատանեկան մշակութային հաստատությունների, կազմակերպությունների շնորհալի պատանիների ներկայացման, արվեստագետների շփումների սերտացման, փորձի փոխանակման, մարզ-մայրաքաղաք կապի ամրապնդման համար: Կարևոր նպատակներից է նաև՝ նախարարության անմիջական աջակցությամբ և օժանդակությամբ ծրագրի շրջանակներում մշակութային ակտիվ համագործակցության ծավալումը մարզերի մշակույթի գործիչների, մշակութային կազմակերպությունների, ուսումնական հաստատությունների ու մայրաքաղաքի համապատասխան կառույցների միջև: