Գունավոր լուսանկարչությունը 151 տարեկան է

Ուղիղ 151 տարի առաջ, 1861 թվականի մայիսի 17-ին, լոնդոնյան Քինգզ-քոլեջում առաջին անգամ հասարակությանը ներկայացվեց գունավոր տպագրությունը՝ ըստ շոտլանդացի ֆիզիկոս Ջեյմս Մաքսվելի մեթոդի։

Որպես լուսանկարվող օբյեկտ Մաքսվելն ընտրել էր շոտլանդական գործվածքի մի կտոր սև թավշի ֆոնին։

Մեթոդի էությունը հետևյալն էր. կարմիր, կանաչ և կապույտ հեղուկներով լցված անոթներից միջով էկրանին միաժամանակ պրոյեկտվում էին երեք ապակե պոզիտիվ, որոնցից յուրաքանչյուրը նախապես նկարահանվել էր նույն գույնի ֆիլտրի միջոցով։

Տվյալ փորձում ֆիլտրի դերը կատարում էին միագույն անոթները։ Այնուհետև պատկերները վերադրվում էին՝ արդյունքում ստեղծելով գունավոր լուսապատճենը։

Այսօր հայտնի է, որ այս մեթոդն այնքան էլ «մաքուր» չէր, քանի որ շոտլանդական ժապավենի վրա եղած կարմիր ներկերը անդրադարձնում էին ուլտրամանուշակագույն ճառագայթները, որոնք էլ լուսանկարման ընթացքում գրանցվում էին ֆոտոժապավենին, իսկ կանաչ ֆիլտրը գունային այնքան էլ հստակ գոտիավորում չուներ և ինչ որ չափով բաց էր թողնում նաև կապույտի ճառագայթները։

Մաքսվելի ժամանակակիցների կարծիքն այդ մեթոդի վերաբերյալ միանշանակ չէր, սակայն կարելի է հստակ պնդել, որ այն ևս մի քայլ էր դեպի իսկական գունավոր տպագրությունը տանող ճանապարհին։