Հայաստանին և Ղարաբաղին 2013-ին հատկացվելիք ամերիկյան օգնությունը հնարավոր է` աճի

Միացյալ Նահանգների Կոնգրեսի Ներկայացուցիչների պալատի հատկացումների ենթահանձնաժողովը առաջարկում է 2013 թվականին Լեռնային Ղարաբաղին հատկացվելիք ամերիկյան օգնությունը հասցնել 5 միլիոն դոլարի' նախագահ Բարաք Օբամայի վարչակազմի նախատեսած 2 միլիոն դոլարի փոխարեն, հաղորդում է «Ազատություն» ռադիոկայանը։ 

Վաշինգտոնի Հայ դատի գրասենյակի եւ Ամերիկայի հայկական համագումարի հաղորդագրությունների համաձայն, Հայաստանին տրամադրվելիք օգնության առնչությամբ ենթահանձնաժողովի առաջարկն է' պահպանել այն ընթացիկ տարվա 40 միլիոն դոլարի մակարդակում եւ չկրճատել 7.2 միլիոն դոլարով, ինչպես եկող տարվա արտաքին օգնության մասին օրինագծում նախատեսում է ԱՄՆ-ի վարչակազմը։

Այս շաբաթ ընդունած նախագծում, որը Ներկայացուցիչների պալատի հատկացումների հանձնաժողովում քվեարկվելու է այսօր, ենթահանձնաժողովը առաջարկում է նաեւ պահպանել Հայաստանին եւ Ադրբեջանին տրամադրվող ամերիկյան ռազմական օգնության հավասարակշռությունը' 2.7-ական միլիոն դոլար' որպես արտաքին ռազմական ֆինանսավորում, եւ եւս 600-հազարական դոլար' միջազգային ռազմական կրթության եւ վարժանքների համար։

Կոնգրեսական ենթահանձնաժողովը վարչակազմին կոչ է անում Վրաստանի հայաբնակ Ջավախք տարածաշրջանին նպատակային օգնության ռազմավարություն ձեւակերպել։

Բացի այդ, ենթահանձնաժողովը Միացյալ Նահանգների պետքարտուղար Հիլարի Քլինթոնին կոչ է անում շարունակել աջակցությունը Միջին Արեւելքում տեղի ունեցող իրադարձությունների հետեւանքով այդ տարածաշրջանում վտանգի ենթարկված հայ եւ քրիստոնյա մնացյալ բնակչությանը։

Ամերիկայի հայկական կազմակերպությունները ողջունել են 2013 թվականի ամերիկյան արտաքին օգնության օրինագծում Կոնգրեսի ենթահանձնաժողովի կատարած փոփոխությունները։

Ենթադրվում է, որ Սենատի համանուն հանձնաժողովը արտաքին օգնության օրինագիծը կարող է քննարկել արդեն եկող շաբաթ։