Մեծ Բրիտանիայի դեսպանը Հայաստանից «ձեռնունայն» չի հեռանում

Մեր երկրում իր դիվանագիտական առաքելությունն ավարտող Մեծ Բրիտանիայի դեսպանն այսօր Մամուլի ազգային ակումբում հանդիպեց լրագրողների հետ։ Ամփոփելով Հայաստանում իր քառամյա գործունեությունը՝ Չարլզ Լոնսդեյլը, ի թիվս բազմաթիվ այլ հարցերի, խոսեց նաև իր անձնական կյանքում կատարված փոփոխությունների մասին։

Հայաստանում աշխատելու ընթացքում Չարլզ Լոնսդեյլն ամուսնացել է դեսպանատան մամուլի ծառայության պետի՝ Մարիա Սադոյանի հետ և Հայաստանից կմեկնի կնոջ ուղեկցությամբ։

Նա նշեց, որ մեր երկրում հասցրել է բազմաթիվ բարեկամներ ձեռք բերել և հեռանում է նորից վերադառնալու ակնկալիքով։ Այս չորս տարվա ընթացքում Լոնսդեյլն եղել է Հայաստանի բազմաթիվ անկյուններում, ինչպես նաև բարձրացել է Արարատի գագաթը։

Լոնսդեյլը վիրավորական ակնարկ չի համարում այն, որ իրեն փոխարինելու է ամուսնական զույգ։ Նա ասաց, որ նրանց հետ տարիներ առաջ աշխատել է Մոսկվայում և բարձր կարծիքի է նրանց մասին։