Կաշառակեր դատավորն ու ծեծող ոստիկանն են դատարկում բյուջեն

Կառավարության նիստերն ու դրանցում քննարկվող հարցերը դարձել են «галочка» դնելու պես մի բան: Հովիկ Աբրահամյանը վաղուց հասկացել է, որ կառավարության նիստերը ոչինչ չեն որոշում և դրանք օգտագործում է երբեմն պոպուլիստական ելույթների, այլ դեպքերում՝ ներիշխանական մրցակիցներին խայթելու համար:

Մի քանի շաբաթ առաջ Հովիկ Աբրահամյանը հանձնարարել էր պարզել, թե մեր պետբյուջեից ինչքան փող է դուրս գրվել ՄԻԵԴ-ի 2014-2016 թ-ի վճիռների հետևանքով: Պարզեցին ու նրան զեկուցեցին՝ 335 հազար եվրո: Հետո ինչ՝ ոչ մի քննարկում: Դե ասենք, ի՞նչ քննարկի Աբրահամյանը, երբ քաջ գիտի, որ շուտով Ստրասբուրգի դատարանի նոր վճիռների հեղեղը սրբելու է մեր բյուջեն, հատկապես հուլիսյան իրադարձությունների հետևանքով:

ՄԻԵԴ-ի՝ ընդդեմ Հայաստանի վճիռները կպակասեն, եթե չլինեն կոռումպացված իշխանություններ, մարդկանց խոշտանգող ոստիկաններ, կաշառակեր և գործադիրին կամակատար դատավորներ: Սակայն, եթե այս ամենը չլինի, վարչապետի պաշտոնում չի լինի նաև Հովիկ Աբրահամյանը, որովհետև նրա և ողջ իշխանության ռեսուրսը հենց կոռուպցիան, մարդ ծեծող ոստիկանն ու կաշառակեր դատավորներն են: Այ, դրա համար էլ, Արգամիչը մանրուքների մեջ չի խորանում:

Սարգիս Հակոբյան