«Թանգարանային գիշեր» ակցիային կմասնակցի շուրջ 60 թանգարան

Գիտություն և Մշակույթ 17 Մայիս, 2012 23:54

Այս տարի «Թանգարանային գիշեր» ակցիան կանցկացվի մայիսի 19-ի լույս 20-ի գիշերը: Ակցիային մասնակցում են Երևանի և մարզերի շուրջ 60 թանգարաններ, որոնցից 28-ը մայրաքաղաքի թանգարաններ են: Բոլոր թանգարանների մուտքը երեկոյան ժ 18:00-24:00-ն անվճար է լինելու: Նախատեսված են ցուցահանդեսներ, էքսկուրսիաներ, համերգներ, քննարկումներ և այլ միջոցառումներ:

«Թանգարանային գիշերը» միջազգային ակցիա է, որի հիմնական նպատակը թանգարանների հնարավորություններն ու պոտենցիալը ցույց տալն է ու երիտասարդներին թանգարաններ ներկայացնելը: Առաջին անգամ այս ակցիան անց է կացվել Բեռլինում՝ 1997 թվականին:

«Թանգարանների աշխատողների և բարեկամների ասոցիացիայի» տնօրեն Մարինե Հարոյանը Լուրեր.com-ի հետ զրույցում կարծիք հայտնեց, որ Հայաստանին հաջողվում է այդ ակցիան մշակութային իրադարձության վերածել:

«Անցած տարի նույնիսկ հերթեր էին գոյանում: Թանգարաններում անվճար օրեր էլի լինում են, բայց այդ օրերին այդքան այցելու չենք ունենում, իսկ «Թանգարանային գիշեր» ակցիայի ժամանակ շատ ենք ունենում, որովհետև թանգարանները որոշակի մշակութային ծրագրեր են առաջարկում իրենց այցելուներին»,- նշեց Հարոյանը:

Նրա խոսքով` թանգարաններն ամեն տարի իրենց բյուջետային հայտերը ներկայացնելիս որոշակի գումար են նախատեսում այդ օրվա միջոցառումների կազմակերպման համար: Մշակույթի նախարարության պաշտոնական կայքի տվյալներով` 2012-ին պետբյուջեից թանգարաններին և ցուցասրահներին ավելի քան 1 մլրդ դրամ է տրամադրվել: Հարցին, թե Մշակույթի նախարարության ծախսած գումարներն արդարացվա՞ծ են և արդյոք ճիշտ նպատակներով են օգտագործվում, Հարոյանը պատասխանեց. «Շատ մեծ գումար չի ծախսվում, որովհետև ընդամենը մի քանի պլակատ է տպվում»:

Ինչպես արդեն նշել ենք, ակցիայի հիմնական նպատակը թանգարանների հնարավորություններն ու պոտենցիալը ցույց տալն է: Լուրեր.com-ի հարցին, թե այս առումով թանգարաններն ի՞նչ ունեն առաջարկելու իրենց այցելուներին, տիկին Հարոյանը համոզմունք հայտնեց, որ թանգարանը կրթական միջավայր է դառնում, բացի այդ դրանք նոր տեխնոլոգիաներ են փորձում օգտագործել:

«Շատ ենք ուզում, որ Եվրոպայում 80-ականներին եղած թանգարանային բումը լինի նաև Հայաստանում, դեռ չի ստացվում: Առաջընթաց ու քայլեր կան, բայց խնդիրները ևս շատ են»: