Երևանում համերգով հանդես կգա հանրահայտ դաշնակահար Արմեն Բաբախանյանը

«Արվեստների Պատկերասրահ» Մշակութային Հիմնադրամի կազմակերպած «Ազգային Պատկերասրահ» Միջազգային Երաժշտական Ութերորդ Փառատոնի շրջանակներում մայիսի 18-ին, ժ.19.00-ին, Կոմիտասի անվան Կամերային Երաժշտության Տանը տեղի կունենա հանրահայտ դաշնակահար Արմեն Բաբախանյանի /դաշնամուր/ մենահամերգը: Ծրագրում` Մոցարտ, Բերգ, Ֆրանկ, Մուսորգսկի։ 

Դաշնակահար Արմեն Բաբախանյանը ուսումը ստացել է Երևանումª պրոֆ. Ա.Բոգդանյանի դասարանում, այնուհետև շարունակել է ուսումնառությունը Կլոդ Ֆրանկի և Վերա Գորնոստաևայի ղեկավարությամբ:

Մի շարք միջազգային հեղինակավոր մրցույթների («Լիդս», »Վան Կլիբերն»,«ՙԳարդիան Դուբլին», «Ուիլիամ Կապել», «Ջինա Բախաուեր»), հաղթող ու մրցանակակիր Արմեն Բաբախանյանը, իր կատարումների անկեղծությամբ ու արտիստիզմով վաղուց գրավել է հանդիսատեսի և երաժշտաքննադատների ուշադրությունը:

Արմեն Բաբախանյանը մենահամերգներով հանդես է եկել ԱՄՆ-ում, Կանադայում, Ճապոնիայում, Միացյալ Թագավորությունում, Ավստրիայում, Իտալիայում, Ֆրանսիայում և այլուր: Որպես մենակատար հանդես է եկել համաշխարհային հռչակ ունեցող մի շարք նվագախմբերի և դիրիժորների հետ, այդ թվում Բիրմինգեմ Սիմֆոնի (սըր Սայմն Ռայթլ), Թագավորական Ֆիլհարմոնիկ, Շոտլանդիայի Ազգային Թագավորական, Իռլանդիայի Ազգային Սիմֆոնիկ Նվագախմբերի, Սլովենիայի Ֆիլհարմոնիկ, Սանկտ-Պետերբուրգի Ֆիլհարմոնիկ (Յուրի Տեմիրկանով) , Մոսկվայի Ֆիլհարմոնիկ (Վալերի Գերգիև) և այլն:Կատարել է բազմաթիվ ձայնագրություններ, նրա համերգները հեռարձակվել են հեղինակավոր հեռուստառադիոընկերությունների կողմից (BBC, PBS , ORF, RAI) :1999-ին հիմնադրել և ղեկավարել է Համահայկական մրցույթը Երևանում: Վարպետության դասեր է տվել Ռուսաստանում, Իսպանիայում, Անգլիայում, Ճապոնիայում, Չինաստանում, ԱՄՆ-ում: 2004-ին հիմնել է Կադանս անսամբլը, որի գեղարվեստական ղեկավարն է:Այժմ Կոմիտասի անվան պետական կոնսերվատորիայի պրոֆեսոր է, 2011-ից` դաշնամուրային ֆակուլտետի դեկան:Շարունակում է ակտիվ համերգային և մանկավարժական գործունեությունը. առաջիկայում պլանավորված են մի շարք ելույթներ և վարպետության դասընթացներ Գերմանիայում, Իտալիայում, Սլովենիայում, Ֆրանսիայում, Կիպրոսում,ԱՄՆ-ում, Ճապոնիայում: