«Թանգարանների գիշեր» ակցիան այս տարի Հայաստանում կանցկացվի «Գիրը փոփոխվող աշխարհում» խորագրի ներքո

Եվրոպական միության, ՅՈՒՆԵՍԿՕ-ի, ինչպես նաև ԻԿՕՄ-ի /Թանգարանների միջազգային խորհուրդ/ հովանու ներքո ամբողջ աշխարհում յուրաքանչյուր տարի անց է կացվում «Թանգարանների գիշեր» միջոցառումը:

ՀՀ մշակույթի նախարարությունը, կարևորելով Եվրոպայի թանգարանների հետ համագործակցությունն ու փոխադարձ կապերի հաստատումը, խրախուսում է Հայաստանի թանգարանների մասնակցությունն ու ինտեգրումը եվրոպական մշակութային ընտանիքին և համակարգում է միջոցառման անցկացումը Հայաստանում: Ինչպես միշտ, այս տարի ևս «Թանգարանների գիշեր» միջոցառումը կհաջորդի Թանգարանների միջազգային օրվան՝ մայիսի 18-ին, կանցկացվի մայիսի 19-ին՝ այսպիսով թանգարանասեր հանրությանը պարգևելով երկօրյա տոն:

Եվրոպական միության կողմից այս տարի հայտարարված «Թանգարանը փոփոխվող աշխարհում» խորագրով «Թանգարանների գիշեր» ակցիան մեր երկրում կանցկացվի «Գիրը փոփոխվող աշխարհում» կարգախոսով՝ նվիրված Հայ գրատպության 500-ամյակին և Երևանը ՅՈՒՆԵՍԿՕ-ի կողմից գրքի 2012 թ. համաշխարհային մայրաքաղաք հռչակվելուն:

Եվրամիության հետ համատեղ և ՀՀ մշակույթի նախարարության համակարգմամբ արդեն 8-րդ անգամ /Հայաստանը միացել է «Թանգարանների գիշեր» նախաձեռնությանը 2005 թ./ անցկացվող այս ակցիան կմիավորի Հայաստանի Հանրապետության բոլոր մարզերի շուրջ 63 թանգարաններ՝ անկախ ենթակայությունից, և մայիսի 19-ին արևամուտից մինչև գիշերվա ժամը 24:00-ը, ժառանգության պահապան այդ կաճառներն իրենց հարկի տակ անվճար կհյուրընկալեն «Թանգարանների գիշեր» միջոցառումների շքահանդեսի մասնակիցներին: Այդ օրը նախագծի մասնակից թանգարանները հանդես կգան հատուկ տոնական միջոցառումներով ու միաժամանակյա աշխատաժամով՝ նորովի ներկայացնելով իրենց հավաքածուների բացառիկ արժեքները: Վերջին 4 տարիների դիտարկման արդյունքներն ինքնին խոսուն են. 2009 թ. «Թանգարանների գիշեր» ակցիային մասնակցել են 26, 2010 թ.՝ 42, 2011 թ.՝ 60, այս տարի՝ կմասնակցեն 63 հայաստանյան թանգարաններ: Հրատարակվել է «Թանգարանների գիշեր» միջոցառումների ծրագիրը:

«Թանգարանների գիշեր» ակցիան սկիզբ է առել 1999 թ. Ֆրանսիայի մշակույթի նախարարության առաջարկով՝ ֆրանսիական թանգարաններում գարնանային որևէ կիրակի հասարակության համար անվճար՝ «բաց դռների» օր հայտարարելով ու անվանակոչելով «Թանգարանային գարուն»: Նախաձեռնությունը շատ շուտով արժանանում է Եվրոպական մշակութային կոնվենցիային անդամակցող 39 երկրների ուշադրությանն ու Եվրոպայի խորհրդի աջակցությանը: 2001 թ. այն վերանվանվում է «Թանգարանների գիշեր»-ի և ընդլայնում ոչ միայն ակցիայի մասնակից երկրների աշխարհագրությունը, այլև աջակցողների ու համակիրների ցանկը:

ՀՀ մշակույթի նախարարությունում «Թանգարանների գիշեր» ակցիային նվիրված ասուլիսին մասնակցում են ՀՀ մշակույթի նախարարի տեղակալ Արև Սամուելյանը, Չարենցի տուն-թանգարանի տնօրեն Լիլիթ Հակոբյանը, Քոչարի թանգարանի տնօրեն Լալա Քոչարը, Թումանյանի թանգարանի տնօրեն Նարինե Թուխիկյանը: