Ես իմ աշխատանքն եմ անում և անում եմ առանց տեսախցիկների. Ռոբերտ Սարգսյան

Ազգային ժողովի Հանրապետական խմբակցության պատգամավոր Ռոբերտ Սարգսյանը, ով Երևանի քաղաքապետ Տարոն Մարգարյանի աներորդին է, այնքան էլ աչքի չի ընկնում իր ակտիվությամբ։ Ազգային ժողովում անհնար է հիշել մի դեպք, երբ պատգամավորը մասնակցած լինի որևէ հարցի քննարկման կամ կառավարության անդամներին հարց ուղղած լինի։ Նա անգամ երկրում տեղի ունեցող կարևոր իրադարձությունների ու փոփոխությունների վերաբերյալ է խուսափում գնահատականներ տալ։

Սակայն, ԼՈՒՐԵՐ.com-ին հաջողվեց ներքաղաքական վերջին իրադարձությունների վերաբերյալ Սարգսյանի կարծիքն իմանալ։ 

-Պարոն Սարգսյան, նախ խոսենք ներքաղաքական վերջին զարգացումների մասին, մասնավորապես, վարչապետի փոփոխության։ Ինչպե՞ս եք գնահատում Կարեն Կարապետյանի նշանակումը այդ պաշտոնում։

- Մեր կուսակցության նախագահը, Հանրապետության նախագահը իր ելույթում մանրամասն ներկայացրել է նրա որակները, բնավորությունը և ընդունակությունները: Եթե կուսակցության նախագահը վստահել է Կարեն Կարապետյանին, և, բացի դա, ՀՀԿ խորհուրդը միաձայն պաշտպանել է նրա թեկնածությունը՝ ապա նշանակումը թերևս արդարացված է: Բացի դա, նորանշանակ վարչապետն անփորձ մարդ չէ, նա բավականին լավ տիրապետում է կառավարման մշակույթին, մի մոռացեք, որ եղել է նաև Երևանի նախկին քաղաքապետը: Ընդանուր առմամբ՝ ելնելով սոցիալական ցանցերում մարդկանց ոգևորվածությունից, սկիզբը բավականին հաջող է, թե ինչպես կլինի հետագան՝ ցույց կտա ժամանակը:

-Կարապետյանն իր գործունեությունը սկսեց բավականին բուռն և սուր քննադատությամբ։ Նա ԱԺ ամբիոնից հայտարարեց, որ երկրի տնտեսությունը գտնվում է ծայրահեղ ծանր վիճակում։ Մի բան, որն իշխանության ոչ մի ներկայացուցիչ չէր խոստովանում։ Ձեր կարծիքով, ինչո՞ւ նա միանգամից նման հայտարարություն արեց։

-Մասնագիտությամբ տնտեսագետ չեմ ու այդ հարցին չեմ կարող մասնագիտական խորը պատասխաններ տալ, բայց, կարծում եմ, որ նա ունի բավարար ինֆորմացիա և գիտելիք, որ նման հայտարարություն անի: Չնայած, իշխանությունները միշտ էլ խոսել են երկրի սոցիալ-տնտեսական վիճակի մասին:

-Նորանշանակ վարչապետը լրագրողների հետ զրույցում ուշագրավ հայտարարություն արեց։ Նա ասաց, որ հաջողակ բիզնեսները չեն խլելու և այսուհետ խաղի այլ, հավասար կանոններ են գործելու։ Նա, ըստ էության, հայտարարեց, որ Հայաստանում վերջին տարիներին գործել է պետական ռեկետ։ Դուք՝ որպես իշխանության ներկայացուցիչ, ինչպե՞ս եք գնահատում այս հայտարարությունը։

- Խստացումը, մանավանդ այս ոլորտում, միայն ողջունելի է, և ես ուրախ եմ, որ նորանշանակ վարչապետը հատուկ շեշտեց, որ կանգնելու է բիզնես անողի, արժեք ստեղծողի կողքին, քանի որ երկրի հիմքը հանդիսացող տնտեսության հենասյունը բիզնես գործունեությունն է, որն իր հերթին հարկեր է մուծում պետությանը, ամրացնում է տնտեսությունը և մարդկանց ապահովում աշխատատեղով: Մամուլում եղել են դեպքեր, որ նման հրապարակումներ են զետեղվել, բայց համաձայնեք, որ միշտ չէ, երբ լրագրողական համայնքը ճշտված ինֆորմացիա է տալիս մարդկանց: Ես նման դեպքի ականատես չեմ եղել: Ձեր այդ հարցին կարող եմ պատասխանել միայն կոնկրետ փաստերի դեպքում: 

-Իսկ նախկին վարչապետի գործունեությունն ինչպե՞ս կգնահատեք։ Չե՞ք կարծում, որ նա փաստացի ձախողեց երկրի կառավարումը։

-Կառավարությունները ձևավորվում են տարբեր պահանջներից ու նպատակներից ելնելով: Այդ տրամաբանության մեջ նայելով, թերևս, Հովիկ Աբրահամյանի կառավարությունը փորձել է իր ժամանակաշրջանում լուծել ինչ որ խնդիրներ, որոնք հրատապ են եղել: Գնահատական տվողը ես չեմ, այլ՝ ժողովուրդը, բայց բնական է, որ որևէ մեկը Հայաստանում չի կարող պնդել, որ մեր տնտեսությունը լավ վիճակում է և այս իմաստով՝ նոր կառավարությունը ու վարչապետ Կարապետյանը իր վրա մեծ պատասխանատվություն է վերցրել, ինչ կլինի հետոն՝ ցույց կտա կյանքը: Ես նրան մաղթում եմ հաջողություն ու բարի կառավարում:

-Կարեն Կարապետյանը կկարողանա՞, ըստ Ձեզ, իշխանության նկատմամբ հասարակության ունեցած անվստահությունը մեղմացնել կամ ծայրահեղ ծանր վիճակում գտնվող տնտեսությունը փոքր ինչ լավացնել։

-Չէի համաձայնի, որ հասարակությունը շատ անվստահորեն է մոտենում իշխանություններին, բայց մյուս կողմից չեմ ժխտի, որ որոշակի ընդգծված անվստահություն ամեն դեպքում կա: Մեր կուսակցությունը, երկրի իշխանություններն ամեն ինչ անում են այդ ուղղությամբ: Ինչ վերաբերվում է վարչապետին՝ կկարողանա, թե՝ ոչ, նորից եմ ասում, ցույց կտա ժամանակը, բայց կա փաստ, որ այն քաղաքական թիմը, որի անդամ եմ նաև ես, վստահել ու հավատում է նոր վարչապետին և կարծում է, որ նա ամեն դեպքում գիտի ինչպես զարգացնել մեր տնտեսությունը: Պետք է ազգովի համախմբված լինենք և ամեն ինչ էլ կարելի է հաղթահարել:

-Պարոն Սարգսյան, Դուք այն պատգամավորներից եք, ովքեր պասիվ են խորհրդարանում։ Օրինակ, քանի՞ օրենսդրական նախաձեռնության եք մասնակցել, քանի՞ անգամ եք ելույթ ունեցել ԱԺ դահլիճից, քանի՞ անգամ եք Կառավարության հետ հարցուպատասխանի ժամանակ հարցեր ուղղել և այլն։

-Գիտեք, ես երբեմն ժպիտով եմ վերաբերվում այդ խոսակցություններին, թե ինչու ելույթ չեմ ունենում: Ես իմ աշխատանքն եմ անում և անում եմ առանց տեսախցիկների: Պատգամավորական իմ շտաբում, ինչպես նաև ՀՀԿ Ավանի տարածքային կազմակերպությունում, լավ գիտեն, որ ես օրվա մեծ մասն անցկացնում եմ աշխատելով: Ծանոթանում եմ օրվա մամուլին, կարդում հրապարակումներ, պատասխանում ֆբ սոցիալական ցանցի իմ էջին եկած նամակներին, կազմակերպում բնակիչների անհատական ընդունելություն, մասնակցում վարչական շրջանում տեղի ունեցող ընդունելություններին, երեկոները շրջում Ավանի այգիներով ու բակերով և փորձում եմ ամենամոտը լինել մարդկանց: Ելույթ չեմ ունենում երևի նաև այն պատճառով, որ բնավորությամբ շատ հանգիստ մարդ եմ: Ավելացնեմ, որ ես ակտիվորեն մասնակցում եմ պետական-իրավական հարցերի մշտական հանձնաժողովի բոլոր նիստերին, Հանրապետական խմբակցության նիստերին, մասնակցում եմ քննարկումերին, հարցեր բարձրացնում և այլն: Իսկ ԱԺ ամբիոնից ելույթ ունենալու մասով կասեմ միայն, որ կյանքը դեռ առջևում է: 

-Ինչպես բոլոր Հանրապետական պատգամավորների, այնպես էլ Ձեր դեպքում, հասարակությանը հետաքրքիր է, թե ձեր անունը ի՞նչ բիզներսների հետ է կապվում։

-Ես բիզնեսներ չունեմ ու բիզնես գործունեությամբ չեմ զբաղվում, դա բոլորը գիտեն:

-Ի՞նչ հարաբերություններ ունեք Քաղաքապետ Տարոն Մարգարյանի հետ, բացի բարեկամանական կապից։ Քանի որ կարծիք կա, որ ձեր քաղաքական կնքահայրը հենց ինքն է։

-Տարոն Մարգարյանը Երևանի քաղաքապետը և իմ բարեկամը լինելուց բացի առաջին հերթին իմ ընկերն է, ում հետ շփումը պարբերաբար է լինում: Չեմ ընդունում ձեր արտահայտությունը, բայց, բնականաբար, Տարոն Մարգարյանը ՀՀԿ գործադիր մարմնի անդամ է, Երևանի քաղաքապետը, ի վերջո՝ լուսահոգի վարչապետ, մեր կուսակցության նախագահ Անդրանիկ Մարգարյանի որդին և նրա քաղաքական փորձառությունն ու գիտելիքը ինձ շատ է օգնել: Ավելին՝ շատ նորմալ եմ համարում, երբ մարդն այլ ոլորտից գալիս է քաղաքականություն և սկզբնական շրջանում մի հեղինակավոր և սիրված ու հարգված մարդ, ինչ-ինչ խորհուրդներով ուղղություն է տալիս: Ես հպարտ եմ, որ իմ պարագայում այդ մարդը Տարոն Մարգարյանն է:

-Ձեզ գալիք խորհրդարանում տեսնո՞ւմ եք։

-Ինձ համար պատգամավոր լինելը կյանքի ամենակարևորը բանը չի եղել, ուղղակի ես հասկացա, որ քաղաքականությունն ինձ հետաքրքրում է, այդ պատճառով էլ շատ համարձակ մտա քաղաքականություն՝ որպես ԱԺ պատգամավոր, չնայած, մինչև պատգամավոր լինելը ես էլի ակտիվորեն զբաղվում էի քաղաքական-կուսակցական աշխատանքով և քաղաքականությունն ինձ համար հաստատ նորություն չէր: Ես 1998թ-ից ՀՀԿ անդամ եմ: Պատգամավոր լինելը միայն ինձանից չի կախված, ես մեծ քաղաքական թիմի անդամ եմ ու, եթե տեսնեմ, որ իմ կուսակցությունը գտնում է՝ ես պիտի լինեմ, եթե տեսնեմ՝ ավանցին ունի իմ կարիքը, ամեն ինչ կանեմ, որ հաջորդ խորհրդարանում լինեմ:

-Օրեր հետո Հայաստանը նշելու է անկախության 25-րդ տարեդարձը: Ի՞նչ եք կարծում, հայ ժողովուրդը գիտակցում է անկախության գինը:

-Կարծում եմ՝ մենք գիտակցում ենք, թե ինչ է անկախությունը և դա երևաց նաև ապրիլյան կարճատև պատերազմում:

Առիթից օգտվելով շնորհավորում եմ բոլորիս Հայաստանի անկախության 25-րդ տարեդարձի առթիվ: Մենք ոչինչ չունենք բացի անկախությունից, այսօրվա անկախությունը մենք ամեն գնով պիտի պահենք ու փայփայենք: Համախմբվածություն ու համբերատարություն եմ մաղթում բոլորիս, այդ դեպքում մենք կհաջողենք բոլոր ոլորտներում:

Հարցազրույցը՝ Քրիստինա Աղալարյանի