Վրացական «Սուլիկո» անսամբլը համերգով հանդես կգա Երևանում

Կոմիտասի անվան Կամերային Երաժշտության Տանը մայիսի 22-ին, ժ.19.00-ին տեղի կունենա Թբիլիսիի Օպերային Թատրոնի մեներգիչների «Սուլիկո» անսամբլի անսամբլի համերգը, որի ծրագրում ընդգրկված են արևմտաեվրոպական, ինչպես նաև վրացի կոմպոզիտորների դասական ստեղծագործությունները, վրացական ժողովրդական, հոգևոր, քաղաքային երգերը:

Համերգը տեղի կունենա «Արվեստների Պատկերասրահ» Մշակութային Հիմնադրամի «Ազգային Պատկերասրահ» Միջազգային Երաժշտական Ութերորդ Փառատոնի շրջանակներում։

Վրաց ժողովրդական երգարվեստը համաշխարհային մշակութային ժառանգության յուրօրինակ դրսևորումներից է. 2001-ին ՅՈՒՆԵՍԿՕ-ի կողմից այն հռչակվել է մարդկության ոչ նյութական ժառանգության մաս: Ի շարս Վրաստանում գործող բազմաթիվ համույթների, այդ արվեստը տարածում և պրոպագանդում է Թբիլիսիի Օպերային Թատրոնի «Սուլիկո» անսամբլը: Այն հիմնադրվել 2007-ին՝ Վանո Գալուաշվիլու և Կախաբեր Օնաշվիլու կողմից: Անսամբլի մասնակիցները Թբիլիսիի օպերայի ճանաչված մեներգիչներ են: Ստեղծագործական ուղու առաջին քայլերից անսամբլը աչքի ընկավ իր բարձր պրոֆեսիոնալիզմով, կատարողական վարպետությամբ ու ճաշակով: Անսամբլը հաճախակի ելույթներ է ունենում այնպիսի հեղինակավոր միջազգային փառատոներում, ինչպիսիք են «Էյլաթ»(Իսրայել), «Ուղղափառ երգեցողության Փառատոն» (Էստոնիա), Համմամեդ (Թունիս), համերգային շրջագայություններով ելույթներ են ունեցել Լատվիայում, Լեհաստանում, Ֆրանսիայում, Գերմանիայում, Շվեյցարիայում և այլուր:Անսամբլի երկացանկը բազմազան է. դասական օպերային երգարվեստից մինչև վրացական երգչախմբային երգեցողություն, հոգևոր, աշխարհիկ ստեղծագործություններ, քաղաքային ռոմանսներ և այլն: