Արփինե Հովհաննիսյանը կշարունակի կոռուպցիայի դեմ պայքարը

ՀՀ արդարադատության նորանշանակ նախարար Արփինե Հովհաննիսյանը հավատարիմ է մնում իր խոստմանը և վստահեցնում է, որ վերանշանակվելուց հետո էլ ավելի եռանդուն կաշխատի: ԱԺ-ում լրագրողների հետ զրույցում՝ նախարարը հավաստիացրեց, որ հստակ անելիքները կներկայացնի առաջիկայում՝ կառավարության ծրագրի հաստատումից հետո:

«Արդարադատության նախարարության իմ տեսլականի մասին շատ եմ առիթներ ունեցել խոսելու և որևէ փոփոխություններ առայժմ չկան: Ձեր հարցը բավականին հետաքրքիր էր, բայց նշանակող և առաջարկող սուբյեկտը ես չեմ»,- պատասխանելով հարցին, թե ինչո՞ւ հենց Ձեզ ընտրեցին, ասաց նախարարը՝ հավելելով, որ փոփոխություններ կլինեն նաև համահունչ կառավարության ծրագրում, որը հավանաբար կներկայացվի առաջիկայում:

Հարցին՝ թե ինչ հստակ առաջադրանքներ է ներկայացրել նորանշանակ վարչապետ Կարեն Կարապետյանը, Ա. Հովհաննիսյանն հարցից խուսափեց և նշեց, որ առաջադրանքներն ու այն տեսլականները, որոնք նախատեսել է ինքը, լրագրողները, և ոչ միայն՝ հնարավորություն կունենան տեսնելու բացառապես կառավարության ծրագրի հաստատումից հետո:

Դիտարկմանը՝ էական տարբերություն կլինի այս և նախկին կառավարության առաջադրանքների կատարման միջև, նախարարն առայժմ դժվարացավ պատաասխանել. «Կտեսնեք: Կտեսնեք նաև, թե ինչպիսին կլինի նաև այդ տարբերությունը»,- ասաց նա:

Շարունակելով խոսքը՝ Ա. Հովհաննիսյանը նշեց, որ կարևորում է հակակոռուպցիոն պայքարի ծրագիրը: Նրա խոսքով՝ այդ ոլորտում ամենակարևոր ու առաջնային ծրագրերից մեկը հենց դա է: «Արդարադատության նախարարությունն առաջիկայում իր հանձնարարականների շրջանակներում հակակոռուպցիոն մի քանի օրինագծեր կներկայացնի ինչպես կառավարություն, այնպես էլ՝ ԱԺ: Առաջինը վերաբերում է ապօրինի հարստացմանը, որը կքրեականացվի, երկրորդը՝ միտված է իրական սեփականատերերի բացահայտմանը, և դրանից ելնելով այս կամ այն կարգավորում կնախատեսվի»,- մանրամասնեց Ա. Հովհանիսյանը:

Ըստ նախարարի՝ ներկայացվող ծրագիրը նոր երանգ և ուժ կհաղորդի նաև հակակոռուպցիոն պայքարին, և դրանով կամփոփվի նաև հակակոռուպցիոն մարմնի աշխատանքները:

Ա. Հովհաննիսյանը ևս մեկ անգամ շեշտեց, որ անչափ կարևորում է հակակոռուպցիոն մարմնի աշխատանքները և ավելացրեց. «Մենք հատվածային լուծումներով վերջնական կամ լավ արդյունքի չենք հասնի: Մարմինը պետք է ունենա գործիքակազմ, իսկ շատ բաներ կախված են լինելու նաև տվյալ մարմնի ղեկավարից: Այսինքն, որ մարմինն էլ լինի, ինչ տեսքով էլ լինի, այն պետք է ունենա համապատասխան լծակներ»,- ընգծեց նա:

Անդրադառնալով փոխառությունների և նվիրատվությունների խնդրին՝ նորաշանակ նախարարն ավելացրեց, որ այդ խնդրի հետ կապված փաթեթներն արդեն մշակման փուլում են: «Ապօրինի հարստացմանը զուգահեռ, նաև պետք է ներկայացվեն այնպիսի փաթեթներ, որոնք կփակեն հնարավոր բոլոր բացերը»,- եզրափակեց նա:

Արմինե Եփրեմյան