Թողեք վարչապետն աշխատի, ամեն մի բառից կառչելը ճիշտ չեմ համարում. Լյուդմիլա Սարգսյան

Lurer.com-ի զրուցակիցն է ՀԱԿ խմբակցության պատգամավոր Լյուդմիլա Սարգսյանը, ում հետ խոսել ենք կառավարության փոփոխություններից:

- Տիկին Սարգսյան, ըստ էության, կարելի է ասել՝ կառավարության հիմնական կազմը չփոփոխվեց: Մեկ-երկու նախարարներ փոխվելով, տեղափոխելով հնարավո՞ր համարում եք լուրջ և արագ փոփոխությունները:

- Ինձ համար շատ կարևոր էր՝ ո՛ւմ հանեց, և ո՛ւմ պահպանեց: Այսօրվա դրությամբ, հիմնականում նրանք, ովքեր պահպանվեցին, առանց պաշտպանության նախարարի և արտգործնախարարի, համենայն դեպս ինձ համար, այդ փոփոխությունները դրական են: Չգիտեմ՝ որքանով պրոֆեսիոնալ ու արդյունավետ կլինեն, դեռ վաղ է այդ մասին խոսելը, բայց ես կածում եմ, որ մենք իսկապես ունեինք այնպիսի դեմքեր, որոնք փոփոխության կարիք ունեին: Կային ոլորտներ, որոնց նախարարների նկատմամբ հանրային վստահություն չկար և նրանց պաշտոնավարման ընթացքում որևէ լուրջ փոփոխություններ չեղան, և որևէ հույսի ակնկալիք նույնիսկ չունեինք էլ: Ամեն դեպքում, այն ինչ արդեն փոխվել է, ես շատ դրական եմ համարում, արդյունքների մասին կխոսենք ավելի ուշ:

- Ամեն դեպքում, Դուք որևէ հույս կամ ակնկալիք ունե՞ք, որ արագ ու դրական տեղաշարժեր կունենանք, ինչպես որ նորանշանակ վարչապետ Կարեն Կարապետյանն է ակնարկում:

- Գիտեք ինչ, այստեղ մի շատ կարևոր բան կա. նախկին վարչապետ Հովիկ Աբրահամյանի կառավարման օրոք, կարծես թե, նրան այսքան ազատություններ ու արտոնություններ չտրվեցին, ինչը չէի ասի Կարեն Կարապետյանի մասին: Թեև Հովիկ Աբրահամյանը նույն կուսակցության անդամ էր, նույն համակարգի ներկայացուցիչ, բայց երբ հայտարարվեց կոռուպցիայի և մենաշնորհների դեմ պայքար, նրան դա թույլ չտրվեց: Իսկ, որպեսզի նա կարողանար մենաշնորհների դեմ պայքարել, լիարժեք ընթացքի մեջ դնել այդ գործընթացը, նրան այդ լիազորությունները պետք է տրվեին: Իսկ Կարեն Կարապետյանին մեծ հնարավորություններ են տրված՝ ինչպես կադրային փոփոխություններ կատարելու, այնպես էլ նոր համակարգի ձևավորման ուղղությամբ: Այսինքն՝ կարող ենք կառուցվածքային լուրջ փոփոխություններ ունենալ, ինչը ես դրական եմ համարում, չնայած որ, կարծում եմ՝ նախարարության անունը փոխելով, ոչինչ չի փոխվում: Մենք արդեն ունենք նման փորձը և անվանափոխությունների նկատմամբ ինքս վերապահումներ ունեմ, որոնք արդեն հայտնել եմ: Մենք տեսել ենք, թե ինչպես են ժամանակ առ ժամանակ նախարարությունները անվանափոխվել, տարանջատվել, հետո նորից միացել: Վերջ ի վերջո, այս տարիների ընթացքում կարելի էր հասկանալ, թե որքանով էր արդյունավետ այդ միացումն ու տարանջատումը: Դրա հետևանքով մենք որոշակի ռեսուրսներ ու միջոցներ ծախսեցինք, որի հնարավորությունը իրականում չունեինք: Եթե նույնիսկ ունեինք էլ, ապա կարելի էր դրանք ուղղել այլ ուղղությունները զարգացնելուն:

Իսկ առհասարակ, ես միշտ էլ ակնկալել եմ փոփոխություններ, այդ փոփոխությունների արդյունքում որոշակի հույսեր են արթնացել, իսկ թե այսօր դրանք որքանով արդարացված կլինեն, ապագան ցույց կտա:

- Ազգային ժողովում, կառավարության հետ հարցուպատասխանի ժամանակ Դուք միշտ բարձրաձայնել եք առողջապահական ոլորտին առնչվող հարցեր: Փոխվել է նաև առողջապահության նախարարն, ով ոլորտի հետ առնչություն ունի այնքանով, որ նա ղեկավարել է Ինգո Արմենիա ապահովագրական ընկերությունը: Առողջապահական ոլորտը կարևորագույն ոլորտներից մեկն է, որը ղեկավարելը մի փոքր բարդ է: Ի՞նչ եք կարծում, Լևոն Ալթունյանը կկարողանա՞ ոլորտը ղեկավարել:

- Ես կխոսեմ նախկին նախարարի մասին, որի նկատմամբ համակրանք ունեմ: Ի դեմս Արմեն Մուրադյանի՝ ես տեսել եմ գրագետ, փորձառու մենեջերի, ով կարողանում էր իր աշխատանքը կատարել, և դժգոհություններն առանձնապես տեսանելի չէին: Դեռ Դերենիկ Դումանյանի օրոք ես ատկատների թեման էի վերհանել, իսկ Արմեն Մուրադյանի օրոք նման տեսանելի երևույթներ չկային: Հիմա՝ որքան նպատակային կլինի նորանշանակ նախարարը, դժվարանում եմ ասել, սակայն ոլորտին տիրապետելը կարևոր նշանակություն ունի: Իսկ, թե որքանով էր տեղին Արմեն Մուրադյանին պաշտոնից ազատելը, չեմ կարող ասել, քանի որ ես դեմ չէի նրան: Նա բավականին պրոֆեսիոնալ էր: Անկախ ամեն ինչից, կարծում եմ, որ մենեջեր լինելով հանդերձ, մարդը պետք է իր ոլորտի մասնագետը լինի, և այստեղ ես իմ անհամաձայնությունն եմ հայտնում վարչապետ Կարեն Կարապետյանին: Նա իր կաբինետը ձևավորում է երիտասարդներով, և բավականին մեծ ուշադրություն է դարձնում արտաքինին, ինչը ես նույնպես կարևորում եմ, և կարծում եմ, որ Արմեն Մուրադյանը բոլոր չափանիշներին համապատասխանում էր:

- Խոսեցիք ատկատներից ու չարաշահումներից: Այ, Կարեն Կարապետյանն հայտարարել է, որ պետք է բացառել «պրիմիտիվ գողությունները»: Շատերն այդ հայտարարությունը թյուրիմացություն են համարում և ասում են, որ փոխաբերական իմաստով է ասված, շատերն էլ կարծում են, որ վարչապետը ճշմարտությունն է բացահայտել: Ձեր կարծիքով, իրականում նորանշանակ վարչապետն ի՞նչ է նկատի ունեցել:

- Ամեն մի արտահայտությունից կառչելը, ճիշտ չեմ համարում: Նա նոր մարդ է, եկել է և փորձում է ինչ-որ բարեփոխում անել: Ես հասկանում եմ, որ մամուլը շահագրգիռ է ինչ-որ սուր բաներ գտնելու մեջ, բայց եթե լրագրողներն իրենց գործն են անում, պետք է թողնեն, որ վարչապետն էլ իր գործն անի: Այ, երբ կտեսնենք, որ նա թերանում է ամեն մի աշխատանքում, կկառչենք ամեն մի բառից: Դեռ ժամանակ կա, և ժամանակ է պետք որպեսզի ինքնադրսևորվի՝ ինչպես նոր վարչապետը, այնպես էլ նոր կաբինետը: Իրականում ես չեմ ուզում մեր երկրում ամեն ինչ սևացնել և, ընդհանրապես, հույս չթողնել մարդկանց մոտ: Ես համարում եմ, որ ամեն մի նոր փոփոխություն իր հետ կարող է արթնացնել մի նոր հույս և մեր հույսերն արդարանան ու ինչ-որ բան փոխել մեր երկրում: Հուսանք, որ գոնե այս անգամ ինչ-որ բան կփոխվի մեզ մոտ:

- Հաջորդ շաբաթ մեկնարկում է խորհրդարանական նոր շաբաթը: Նոր կառավարություն, նոր դեմքեր… Ինչ-որ նոր հարցեր նախապատրաստե՞լ եք:

-Ես մտածում եմ արդեն այդ ուղղությամբ, բայց թողնենք ամեն ինչ իր ժամանակին: Իսկ, ընդհանրապես, ես հարցը չեմ սիրում նախապատրաստել: Լինում են դեպքեր, երբ դրանք հանպատրաստից են ծնվում: Պահի տակ ինչ-որ բան որոշում եմ, դա էլ անում եմ:

Արմինե Եփրեմյան