«Չորրորդ ինքնիշխանություն». Արմավիրի մարզպետը դիմել է Սամվել Կարապետյանի օգնությանը

Ինչքան էլ ՀՀ կառավարության ղեկավար մարմինների կողմից ՀՀ մարզպետներին ներքին կարգով զգուշացրել էին, որ իրենց պաշտոններում մնալու համար որևէ միջնորդություն ու բարեխոսություն չլինի, բանից պարզվում է, որ մի քանիսին այդպես էլ չի հաջողվել զերծ մնալ ձևավորված ավանդույթից: Օրինակ, Արմավիրի մարզպետ Աշոտ Ղահրամանյանը, «ՉԻ» աղբյուրների փոխանցմամբ, այս ընթացքում հանդիպել է իր գլխավոր հովանավորի՝ «Տաշիր Գրուպ» ընկերության նախագահ Սամվել Կարապետյանի՝ Կալուգայի Սամվելի հետ՝ վերջինիս հետ անկեղծանալով, որ լավ կլինի մինչև 2013–ը ինքը մնա մարզպետի պաշտոնում, նոր դրանից հետո կարող է և պատվով հեռանալ: Նույն լուրերի համաձայն, խոսում են, որ Կալուգայի Սամվելր չի մերժել մարզպետի խնդրանքը՝ ասելով, որ կփորձի հնարավորինը անել նրա համար: Իսկ ահա Արագածոտնի մարզպետ Սարգիս Սահակյանն էլ իր հերթին փորձ է արել վերականգնել իր հարաբերությունները ՀՀԿ վերնախավի մոտ մեծ «պրախոդ» ունեցող ՀՀԿ-ական պատգամավոր Նահապետ Գևորգյանի՝ Սարդարապատցի Նովոյի հետ, սակայն վերջինս չի ցանկացել լսել Սահակյանի մեկնաբանաթյաններն ու արդարացումները այն ամենի առթիվ, ինչի պատճառով նրանց միջև մարզպետի նշանակման օրվանից ամիսներ անց սև կատու է անցել:

«ՉԻ»–ն ավելացնում է, որ ժամանակին Սարգիս Սահակյանը մարզպետ է դարձել բացառապես Նահապետ Գևորգյանի միջնորդությունների արդյունքում, որին էլ հաջորդել են մի շարք անցանկալի պատմություններ, ինչի մասին «ՉԻ»–ն խոստանում է խոսել այլ հրապարակման շրջանակներում: