Այսօր Համո Բեկնազարյանի ծննդյան օրն է

Այսօր կինոռեժիսոր, Հայֆիլմ կինոստուդիայի հիմնադիր Համո Բեկնազարյանի ծննդյան օրն է:

Համո Բեկնազարյանը ծնվել է 1892-ի մայիսի 19-ին Երևանում:

1914-ից սկսել է նկարահանվել ռուսական ֆիլմերում: Դասվել է ռուսական համր կինոյի աստղերի շարքին:1918-ին ավարտել է Մոսկվայի առևտրի ինստիտուտը (մինչ այդ պրոֆեսիոնալ մարմնամարզիկ է եղել): 1921-ից գլխավորել է Վրաստանի կինոստուդիայի կինոյի բաժինը, ապա դարձել Վրաստանի Պետկինոյի ռեժիսոր:

1923-ին Համո Բեկնազարյանը հաստատվել է Հայաստանում և հիմնադրել «Հայֆիլմ» կինոստուդիան: 1926-ին նկարահանել է հայկական առաջին գեղարվեստական ֆիլմը՝ «Նամուս»-ը: Ականավոր ռեժիսորի թողած ստեղծագործական վիթխարի ժառանգությունից կարելի է դատել, որ նա անսահման հնարավորություններ ուներ դրսևորելու իր տաղանդի ահռելի ուժը: Դրա վառ ապացույցն այն էր, որ 1920-ականներին ընդունել է Հայաստանի կառավարության հրավերը, քաջ տեղյակ լինելով, որ այնտեղ կինոարտադրության և ստեղծագործական գործունեության համար նույնիսկ նվազագույն հիմքեր չկան: Այդ տարներին նա սիմվոլիկ գումարներով նկարահանել է այնպիսի ժապավեններ, ինչպիսիք են «Զարե», «Շոռն ու շոռշոռը»:

Նրա ստեղծած առաջին հայկական ձայնային ֆիլմը՝ «Պեպո»-ն, դարձավ ոչ միայն Բեկնազարյանի գլուխգործոցը, այլև տեղ գտավ ժողովրդական կինոյի ոսկե պահոցում: Ավելի ուշ նկարահանել է հայ կինոյի 2 այլ հրաշալի ֆիլմեր՝ «Դավիթ Բեկ» (1943) և «Զանգեզուր» (1938): Վերջինի համար Ստալինի կողմից խրախուսական մրցանակի է արժանացել:

«Երրորդ քարավան» ֆիլմը, որն ամենայն հավանականությամբ դառնալու էր նրա կարիերայի ամենահաջողված ֆիլմը, մնաց անավարտ, քանի որ նկարահանումները կեսից արգելեցին և նախագիծը փակեցին: Բեկնազարյանը,  լքելով «Հայֆիլմ» կինոստուդիան ու Հայաստանը, սկսել է ֆիլմեր նկարել միջինասիական հանրապետություններում:

Հայ կինոյի հիմնադիրը 1965-ի ապրիլի 27-ին մահացել է ծանր հիվանդությունից՝ Մոսկվայում՝ հեռու հայրենիքից և հարազատներից, միայնության մեջ: