Կարեն Կարապետյանը չի խնայում անգամ վերնախավի ներկայացուցիչներին

Մամուլում տարածվող հրապարակումների համաձայն՝ նախօրեին ՀՀ առողջապահության նորանշանակ նախարար Լևոն Ալթունյանն իր մոտ է կանչել փոխնախարար Տիգրան Սահակյանին, տհաճ զրույց ունեցել՝ ասել է, թե շուտով հրաժեշտ կտանք ևս մեկ փոխնախարարի:

Այս պատմությունն այնքան չէր շրջանառվի մամուլում, եթե հիշյալ անձը չլիներ բավականին կարկառուն պաշտոն ունեցող անձի որդին:

Տիգրան Սահակյանը ԱԺ նախագահ Գալուստ Սահակյանի որդին է:

Ստացվում է՝ վարչապետ Կարեն Կարապետյանը չի խնայում անգամ վերնախավի ներկայացուցիչներին, և կոտորածն անգութ է լինելու…

Հարց է՝ արդյո՞ք գործը կհասնի վերջակետին, թե՞ սա կլինի Հովիկ Աբրահամյան-Արման Սահակյան խաղի շարունակությունը:

Բոլորս գիտենք, որ Հովիկ Աբրահամյանը ՀՀ նախկին վարչապետն է, իսկ պետական գույքի կառավարման վարչության պետ Արման Սահակյանը՝ Գալուստ Սահակյանի մյուս որդին:

Հովիկ Աբրահամյանն իր պաշտոնավարման տարիներին առիթը բաց չէր թողնում և պարբերաբար հրապարակավ նկատողություն էր անում Արման Սահակյանին, որն էլ առիթ էր տալիս խոսակցությունների, թե մոտ է Արման Սահակյանի պաշտոնանկության պահը:

Սակայն փաստը մնում է փաստ, որ նման բան տեղի չունեցավ:

Ի դեպ, Արման Սահակյանը հասցրել է նկատողություն ստանալ նաև Կարեն Կարապետյանից: Սեպտեմբերի 22-ի կառավարության նիստի ժամանակ, երբ Սահակյանը ներկայացնում էր նախագիծ, որը վերաբերում էր Կ. Դեմիրճյանի անվան մարզահամերգային համալիրից ավելի քան 1 մլրդ դրամի շարժական և անշարժ գույք գնելուն, վարչապետը դիտողություն արեց.

«Այդ միլիարդները ի՞նչ շարժական տեխնիկա է: Ես հասկանում եմ, որ դա բեռ է ու բարդ է բիզնես ծառայության համար, սակայն այլ տարբերակ չունենք, մենք պետք է ճիշտ կառավարիչ ունենանք: Ամբողջ աշխարհում համալիրները փող են աշխատում: Այս ոլորտը պետք է տանք մի կառավարչի, ասենք՝ մեզնից փող մի ուզի, մի բան էլ դու շահույթ ունեցի ու մի հատ էլ հարկ տուր»…

Վերդառնանք Տիգրան Սահակյանի հարցին ու սպասենք՝ կամ նա կհեռանա մոտալուտ օրերս, կամ էլ, ամեն դեպքում, կհարգեն ԱԺ նախագահին ու կսպասեն մինչ 2017 թվականի ապրիլը՝ ԱԺ ընտրությունների օրը:

Բոլորիս ավելի քան հայտնի է, որ Գալուստ Սահակյանը 2017-ին էլ չի պաշտոնավարելու:

Անի Սահակյան