Մեր ճանապարհները նորից կխաչվեն. Լյուդմիլա Սարգսյանը

ՍԴՀԿ ատենապետ Լյուդմիլա Սարգսյանը Լուրեր.com-ի հետ զրույցում, անդրադառնալով ՀԱԿ-ից «Հանրապետություն» և Հայաստանի լիբերալ կուսակցությունների դուրս գալուն, նշեց, որ իրենք միասին պայքարել են մեկ նպատակի համար և վաղ թե ուշ նրանց ճանապարհները կրկին խաչվելու են:

«Նրանք մեր ընկերներն են, կարծում եմ՝ շարունակում են մնալ մեր ընկերները, ում հետ համատեղ մենք շատ լուրջ պայքար ենք տարել, բայց եթե իրենք այսօր գտնում են, որ այդ ճանապարհը իրենց համար չի կամ տեսնում են պայքարն ավելի արդյունավետ դարձնելու մեկ այլ ճանապարհ, ես նրանց հաջողություն եմ մաղթում և կարծում եմ, որ կգա մի օր, որ մեր ճանապարհները նորից կխաչվեն, որովհետև մեր բոլորի նպատակը մեկն է՝ մեր երկրում օրինականության հաստատումը և դրա համար մենք պետք է ազատվենք քրեաօլիգարխիկ համակարգից։ Կարծում եմ՝ նրանք ևս այդ ճանապարհը շարունակելու են:

Խնդիրն ընդամենը մոտեցումների մեջ է, գուցե իրենք գտնում են, որ մեկ այլ ձևով է պետք պայքարել, որ ավելի արդյունավետ լինի: Ես կարծում եմ, որ այո, այդ մոտեցումը նրանց մոտ կա, մինչդեռ իրենք պետք է ասեն, թե մոտեցումն ինչպես են տեսնում և ինչքանով դա կարող է արդյունավետ լինել։ Եթե իրենց մոտ ստացվի, ես միայն ուրախ կլինեմ», - նշեց Լյուդմիլա Սարգսյանը:

Հարցին, թե արդյոք կարելի՞ է նշված կուսակցութունների վարքագիծը համարել համագործակցություն իշխանական թևի հետ, Սարգսյանը պատասխանեց. «Գիտեք, ես կարծում եմ, որ այդ կուսակցությունները չեն ընտրի այդ շարունակությունը, բայց որևիցե մեկի փոխարեն այսօր ինչ-որ բան ասել ես չեմ կարող. կարծում եմ, որ այդպես չի լինի», - նշեց Լյուդմիլա Սարգսյանը:

Հիշեցնենք, երեկ հայտարարությամբ հանդես են եկել Արամ Սարգսյանի ղեկավարած «Հանրապետություն» և Հովհաննես Հովհաննիսյանի ղեկավարած Հայաստանի լիբերալ կուսակցությունները, որով հայտնում էին, որ իրենք դուրս են գալիս ՀԱԿ-ի կազմից:

Ազատուհի Արասխանյան