Հայաստանը հյուրընկալել է ՌԴ վաստակավոր արտիստ Վենիամին Սմեխովին

Հայ-ռուսական մշակութային համագործակցության և «Հայաստանում ռուսական մշակույթի սեզոններ» ծրագրի շրջանակներում ս. թ. նոյեմբերի 12-16-ը Հայաստանում է գտնվում թատրոնի և կինոյի անվանի դերասան, Ռուսաստանի Դաշնության ժողովրդական արտիստ Վենիամին Սմեխովը, տիկնոջ` արվեստագիտության թեկնածու, Ա. Չեխովի անվան Մոսկվայի գեղարվեստական թատրոնի` МХТ-ի դպրոց-ստուդիայի դոցենտ, թատերական քննադատ Գալինա Աքսիոնովայի հետ:

Այսօր ժամը 20:00 Կ. Ստանիսլավսկու անվան ռուսական պետական դրամատիկական թատրոնում տեղի կունենա Վենիամին Սմեխովի ստեղծագործական երեկոն:

Ռուսաստանից ժամանած արտիստներն այս օրերին հանդիպում կունենան նաև Երևանի կինոյի և թատրոնի պետական ինստիտուտի ուսանողության և դասախոսական կազմի հետ, հանդես կգան վարպետության դասերով: ՀՀ մշակույթի նախարարությունում այդ առթիվ հրավիրվել էր մամուլի ասուլիս, որին մասնակցում էին ՀՀ մշակույթի նախարար Հասմիկ Պողոսյանը, Ռուսաստանի Դաշնության ժողովրդական արտիստ Վենիամին Սմեխովը, թատերական քննադատ Գալինա Աքսիոնովան, Երևանի կինոյի և թատրոնի պետական ինստիտուտի ռեկտոր Արմեն Մազմանյանը:

Վենիամին Սմեխովը նկարահանվել է ավելի քան 25 ֆիլմերում, թատրոնի բեմերում կերպավորել է 5 տասնյակից ավելի դերեր, Ռուսաստանում և արտերկրում հայտնի է որպես դրամատիկական և օպերային ներկայացումների բեմադրիչ: Ներկայում ԱՄՆ համալսարաններում դասավանդում է դերասանի վարպետություն: Ստեղծագործում է չափածո և արձակ:

Այս այցը ՌԴ ժողովրդական արտիստ Վենիամին Սմեխովի 3-րդ մշակութային գործուղումն է Հայաստան: 1-ինը` 2007 թ. ռուս մտավորական արվեստագետների հետ /պատվիրակության կազմում/ ստեղծագործող հայ երիտասարդության հանդիպման շրջանակում, ապա 2008 թ.`«Հայաստանում ռուսական մշակույթի սեզոններ»-ի մեկնարկային ծրագրով:

«Հայաստանում ռուսական մշակույթի սեզոններ» նախագիծը, որը կյանքի է կոչվել ՀՀ և ՌԴ մշակույթի նախարարությունների համատեղ նախաձեռնությամբ 2008 թ., քաջ հայտնի է արվեստասեր հասարակայնությանը` բազմաբնույթ ու բարձրարժեք արվեստի մատուցմամբ: Ընթացիկ տարում Հայաստանում «Սեզոնների» շրջանակներում ապրիլին ներկայացվել է համատեղ ջազային ծրագիր` Ռուսաստանի Օլեգ Լունդստրեմի ջազ նվագախմբի և Հայաստանի ջազ բենդի մասնակցությամբ, հունիսին` Ռուսաստանի օրվա կապակցությամբ Հ. Պարոնյանի անվան երաժշտական կոմեդիայի պետական թատրոնում մեծ հաջողությամբ կայացել է ՌԴ ժողովրդական արտիստ Վլադիմիր Դեվյատովի «ЯR-марка» խմբի համերգը: Հայաստանում «Ռուսական մշակույթի սեզոններ» ծրագրի շրջանակներում Գաբրիել Սունդուկյանի անվան ազգային ակադեմիական թատրոնում ներկայացվել է Մոսկվայի Չեխովի անվան միջազգային թատերական փառատոնի և Լոնդոնի «Չիկ բայ ջաուլ» թատրոնի համատեղ նախագիծը` Շեքսպիրի «12-րդ գիշեր» հանրահայտ ներկայացումը: Ընդամենը վերջերս Հայաստանում հյուրընկալվեց Բորիս Գրաչևսկին` «Հանդիպումներ Երալաշի հետ» ծրագրով` Կինոյի և հեռուստատեսության զարգացման հայկական հիմնադրամ երեխաների և պատանիների համար «Ռոլան Բիկովի» փառատոնի շրջանակում: Առաջիկայում` դեկտեմբեր ամսին հայ թատերասերները հնարավորություն կունենան Հայաստանում Ռուսատանի մշակույթի սեզոնների շրջանակներում ծանոթանալ նաև Առնո Բաբաջանյանի և Միքայել Թարիվերդիևի հոբելյաններին նվիրված համատեղ նախաձեռնություններին: