Նյու Յորքի ցուցահանդեսում կներկայացվեն ԱՄՆ–ի համար ամենավտանգավոր ռուսական լրտեսի սարքերը

Նյու Յորքի Discovery Times Square ցուցասրահում բացվել է լրտեսության համար նախատեսված սարքավորումների ցուցահանդեսը, որում ներկայացված են նաև հայտնի լրտես Աննա Չապմանի օգտագործած սարքերը, մասնավորապես՝ հզոր Wi-Fi համակարգով Chanel ապրանքանիշի պայուսակը և չարաբաստիկ նոթբուքը, գրում է The New York Post-ը։

«Եթե Աննա Չապմանն այստեղ ևս կես տարի մնար, նա կարող էր դառնալ Ամերիկայի պատմության ամենավտանգավոր լրտեսը։ Նա հնարավորություն կունենար մտնել ցանկացած մարդու մոտ»,- ասել է ԱՄՆ Կենտրոնական հետախուզական ծառայության նախկին աշխատակիցներից մեկը։ Նրա խոսքերով` լրտեսը բացահայտվել է այն բանից հետո, երբ իր անսարք նոթբուքը փոխանցել է ԱՄՆ Հետախուզությունների դաշնային բյուրոյի աշխատակցին, որը ռուսական հետախուզության ագենտ է ձևացել։ Երբ Աննան գանգատվել է նոթբուքի անսարքությունից, ՀԴԲ–ի աշխատակիցն առաջարկել է այն նորոգել ռուսական հյուպատոսարանում, և լրտեսուհին փոխանցել է սարքը նրան։

Բացի այդ, ռուսական ագենտ ձևացած ՀԴԲ աշխատակիցն Աննային խնդրել է ռուսական մեկ այլ լրտեսի փոխանցել կեղծ անձնագիր, և Աննան համաձայնել է։ Դրանից հետո նա զանգահարել է Մոսկվա և պատմել կեղծ անձնագրի մասին։ Հայրն Աննային ասել է, որ ոչ մի դեպքում չփոխանցի անձնագիրը, քանի որ դա կարող է թակարդ լինել, իսկ երբ Աննան ասել է, որ ռուսական լրտես ներկաայցած անձին է փոխանցել իր նոթբուքը, նրա հայրն ասել է, որ «պետք չէր նման քայլի գնալ»։ Հաջորդ օրը Աննան փորձել է ձերբազատվել կեղծ անձնագրից` այն տանելով ոստիկանություն և ներկայացնելով իբրև պատահաբար գտած փաստաթուղթ, սակայն նրան ձերբակալել են։ Այդպիս է չեզոքացվել ԱՄՆ–ի համար ամենավտանգավոր ռուսական լրտեսը։