Մեր հուշագրին որոշ ուժեր միտումնավոր են միացել. Մարուքյան

ԱԺ-ում ԸՕ քննարկման ժամանակ ԱԺ պատգամավոր Էդմոն Մարուքյանն անդրադառնալով Վանաձորի ՏԻՄ ընտրություններին՝ հայտարարեց, որ քննարկվում է ըստ էության փոփոխությունների նախագիծ, բայց իրականում ընտրական պրոցեսների հետ ոչինչ էլ չի փոխվել: «Եթե միջամտություն չլիներ, իշխանությունները կասեին, թե սահմանադրական բարեփոխումները կյանքի կոչվեցին, սակայն դա այդպես չէ: Ես չեմ հավատում այն հայտարարություններին, թե իշխանություններն ուժեղ ընդդիմության անհրաժեշտություն են տեսնում: Հերթական ընտրությունները ցույց տվեցին, որ իշխանություններն, ինչպես նախկինում, այնպես էլ սահմանադրական բարեփոխումներից հետո կիրառել ու կիրառելու են բոլոր մեխանիզմները, որ պաշտպանեն իրենց դիրքերը»,- հայտարարեց պատգամավորը:

Նա շեշտեց, որ Վանաձորի ընտրությունները հերթական անգամ ցույց տվեցին, որ Հանրապետականները ջուրը լցրեցին Հանրապետականների երկու տարվա կատարած աշխատանքը: «Քանի դեռ մենք այս ճանապարհով ենք գնում, իշխանությունները վտանգավոր են դառնում պետական ապարատի համար»,- հավելեց նա:

Էդմոն Մարուքյանն ընդգծեց նաև, որ բոլորն ապշած են, թե Հայաստանում ինչ ուժեղ ընտրական օրենսգիրք են մշակել ու ընդդիմությանն իշխանությունն ամեն ինչին զիջում է, սակայն նոր ընտրությունները ևս մեկ անգամ ապացուցեցին, որ իշխանություններն իրենց ձեռագիրը չեն փոխել ու տակից են գործում: «Փորձը ցույց տվեց, որ ընդդիմությունը կարող է ստանալ ձայների մեծամանասությունը և ձևավորել նոր մեծամասնություն: Սա շատ լավ մտածված գաղտնի քայլ է, որը միայն իշխանությունների մտքով կարող էր անցնել: Այսինքն՝ նոր ԸՕ-ով ընդդիմությունը կարող է ունենալ մեծամասնություն, հետո իշխանությունները գան ու նշանակեն վարչապետ: Գիտեք, շատ հեշտ է: Պետք է պարզապես ընդդիմադիր ուժերն իմանան՝ ում հետ գործ ունեն»,- հեգնեց պատգամավորը՝ շարունակելով, որ պարզից էլ պարզ էր, որ հուշագրին որոշ ուժեր միացել են միտումնավոր:
«Էդ մարդիկ էդ պայմանավորվածությունը խախտել են, հիմա էլ ընդդիմությանն են մեղադրում: Երբ որ հուշագիրը ստորագրվեց, փորձագիտական մի շրջանակ մեզ հուշում էր, որ մեզ խաբում են, թե քվեարկությունը գաղտնի է, ու դեռ կտեսնենք՝ կընտրվի ընդդիմությունը, թե՝ ոչ: Այսինքն թերթերով մեզ ուղերձ էին հղում, որ միասնականություն լինել չի կարող, դա տեղի չի ունենալու և, որ դա իշխանությունների կողմից մշակված հստակ ծրագիր է»,- եզրափակեց նա: