Տիգրան Սարգսյանը վերադառնո՞ւմ է

Հովիկ Աբրահամյանի կառավարության պաշտոնանկությունից հետո որոշակի ակտիվություն է դրսևորում Հայաստանի նախկին վարչապետ, ԵՏՄ տնտեսական հանձնաժողովի նախագահ Տիգրան Սարգսյանը: Եթե այսօրվա կարգավիճակը բնական է դարձնում նրա ակտիվ մասնակցությունը ԵՏՄ տնտեսական ֆորումին, ապա Նյու Յորքում կազմակերպված «Հայաստան» ներդրումային համաժողովում Տիգրան Սարգսյանի ակտիվ դերակատարությունը նույնիսկ որոշակի հակադրության մեջ է մտնում նախկին վարչապետի եվրասիական այսօրվա կարգավիճակի հետ:

Հատկապես համակարգային տրանսֆորմացիայի փուլում և խորհրդարանական ընտրություններից առաջ` նման իրադարձությունները դժվար է դասել պատահականությունների շարքին: Թե՛ Երևանում և, թե՛ Նյու Յորքում Տիգրան Սարգսյանը խոսել է այն առավելությունների, գրավչության մասին, որ, իբրև թե, ԵՏՄ-ի պես մեծ շուկան ընձեռում է Հայաստանի տնտեսությանը:

Արտաքուստ կարող է թվալ, որ Հայաստանի կառավարության նախկին ղեկավարը զբաղված է ԵՏՄ-ի քարոզչությամբ, մանավանդ, այս կառույցի ակնհայտ չկայացվածությունը և ճգնաժամը նման անհրաժեշտություն ծնում են: Մյուս կողմից` ԵՏՄ-ն Մոսկվայի պռոեկտն է, և քիչ հավանական է, որ Արևմուտքում կասկածելի համարվող այս նախագիծը խաղարկելով՝ լուծվի հայաստանյան ներդրումների հարցը: Սերժ Սարգսյանը սա հրաշալի հասկանում է և, վստահաբար, Տիգրան Սարգսյանին Նյու Յորք չէր տանի ԵՏՄ-ի քարոզչությամբ զբաղվելու համար: Պակաս կարևոր չէ այն հանգամանքը, որ Տիգրան Սարգսյանը, չնայած այսօրվա իր պաշտոնին, ամենևին էլ Եվրասիական ինտեգրացիայի ջատագով չէ: 

Բավական է հիշել, որ մինչև 2013-ի սեպտեմբերի երեքը Հայաստանի վարչապետ Տիգրան Սարգսյանը եղել է ԵՏՄ-ին Հայաստանի անդամակցության հրապարակային հակառակորդներից մեկը և այդ թեմայով նույնիսկ ծավալուն հոդված է հրապարակել ռուսական մամուլում:

Մեկ այլ վարկածի համաձայն, Տիգրան Սարգսյանը որոշակի հեղինակություն է վայելում միջազգային տնտեսական կառույցներում և նրա ներկայությունը Նյու Յորքի համաժողովին` նպատակ ուներ նպաստելու Հայաստանի համար խիստ կենսական ֆինանսական խնդիրների լուծմանը: Այս վարկածը նույնպես պակաս արժանահավատ է թվում: Արևմուտքում նախևառաջ գնահատում են ոչ թե այս կամ այն անձին, այլ` երկրի համակարգը, որում Տիգրան Սարգսյանն այս պահին էական դերակատարություն, ֆորմալ մասնակցություն չունի: Ավելի հավանական է, որ Հայաստանում ստեղծված նոր իրավիճակը Տիգրան Սարգսյանի հայաստանյան քաղաքականություն վերադառնալու բարենպաստ վիճակ է ստեղծում, մանավանդ, նախկին վարչապետին մոտիկից ճանաչող մարդիկ ասում են, թե Մոսկվայում նա իր կոմֆորտը չի վերագտել: Գուցե Սերժ Սարգսյանը կարծում է, թե Տիգրան Սարգսյանը տեղ ունի իշխանական նոր կոնֆիգուրացիայում, որն ուրվագծվելու է առաջիկա ամիսներին:

Չմոռանանք, որ ասպարեզից հեռացվել է նախկին վարչապետի ներիշխանական հիմնական ախոյանը՝ Հովիկ Աբրահամյանը, ինչը որոշակի լեգիտիմություն է հաղորդում Հայաստանյան քաղաքականություն Տիգրան Սարգսյանի վերադարձի համար:

Արդյո՞ք Տիգրան Սարգսյանի համար նոր նիշ է վերապահված Հայաստանի քաղաքական կյանքում, թե՞ նա դիտարկվում է որպես «պահեստային տարբերակ»՝ ցույց կտա ժամանակը:

Սարգիս Հակոբյան