Բաշար Ասադը պետք է հեռանա. ԱՄՆ իշխանություններ

Սիրիական ճգնաժամի կարգավորմանը հասնելու համար միայն ՄԱԿ-ի դիտորդների տեղակայումն ու հրադադարի ռեժիմը բավարար չեն: Այդ նպատակին հասնելու համար անհրաժեշտ են նաև քաղաքական փոփոխություններ, այդ թվում՝ նախագահ Բաշար Ասադի հեռացումը զբաղեցրած պաշտոնից: Նման հայտարարությամբ է հանդես եկել ԱՄՆ նախագահի օգնականի տեղակալ Բեն Ռոդսը, որը ղեկավարում է ռազմավարական հաղորդակցության ոլորտը:

Նրա խոսքերով, ԱՄՆ իշխանությունները համարում են, որ Սիրիայում քաղաքական գործընթացները պետք է համահունչ լինեն սիրիական ժողովրդի ցանկություններին:

Ռոդսը նաև ասել է, որ Մեծ ութնյակի երկրների ներկայացուցիչների աշխատանքային ընթրիքի ժամանակ նախագահ Բարաք Օբաման իբրև իշխանության խաղաղ փոխանցման օրինակ է մատնանշել Եմենը: