ՀԱԿ-ի քաղաքական բլեֆը «ջրվեց»

Շաբաթ օրն իրադարձություններով հարուստ չէ, և երեկ ՀԱԿ-ը որոշել էր փորձարկված քարոզչական տեխնոլոգիա կիրառել իր մասին հիշեցնելու և քաղաքական օրակարգ թելադրելու ակնկալիքով: Օրվա մեջ մի քանի անգամ ազդարարվեց թե իբր ՀԱԿ-ը հանդես է գալու «դարակազմիկ» հայտարարությամբ: Երբ նույնիսկ աննշան վարկանիշ և ազդեցություն ունեցող կուսակցությունն է նման բան խոստանում հասարակության մոտ որոշակի սպասում է առաջանում: Սակայն ՀԱԿ-ի հնարքը ձախողվեց, որովհետև հասարակական սպասման վակումը լրացրեց Կարեն Կարապետյանի ծավալուն հարցազրույցը և գրեթե բոլորը մոռացան ՀԱԿ-ի հայտարարության մասին:

Լևոն Տեր-Պետրոսյանի թիմում այնքան շրջահայաց գտնվեցին, որ մի քանի օրով հետաձգեցին հայտարարության հրապարակումը՝ վարչապետի հարցազրույցի ստվերում չհայտնվելու համար:

Երեկ երեկոյան հրապարակայնացվեց միայն Լևոն Զուրաբյանի խոսքը, թե սպասվող հայտարարությամբ «թավշյա հեղաոխություն» է նախապատրաստվում: 

Վերջնականապես համոզվեցի, որ ՀԱԿ-ն ամբողջովին կորցրել է քաղաքական ադեկվատությունը և հինգ-վեց ամսվա կտրվածքով խոստանում է վերացական մի բան, որը հենց երեկ իր հարցազրույցով, ըստ էության գործնականում իրականացնում էր Կարեն Կարապետյանը: Երբ քաղաքական ուժն անկախ իր երբեմնի ազդեցիկությունից կորցնում է քաղաքական ադեկվատությունը, կանգնում է լուրջ երկընտրանքի առջև՝ հայտնվել լուսանցքում կամ՝ տեղավորվել իշխանության պրոեկտներում:

Թերևս Լևոն Տեր-Պետրոսյանը հասկանում է այդ դիլեմայի քաղաքական ողբերգականությունը, որը սպառնում է իր թիմին և գերադասում է հրապարակային դաշտում դրսևորվել ՀԱԿ-ից առանձին՝ առաջին նախագահի կարգավիճակով: Սա միակ ճանապարհն է, որ Սերժ Սարգսյանի հետ հնարավոր պայմանավորվածությունները կունենան գործընկերային բնույթ՝ ՀԱԿ-ին փրկելով Բաղրամյան 26-ի պարիսպների մոտ «հերթագրվելու» տխուր հեռանկարից:

Սարգիս Հակոբյան