Այսօր ՁԻԱՀ-ից մահացած մարդկանց հիշատակի համաշխարհային օրն է

ՁԻԱՀ-ից մահացած մարդկանց հիշատակի համաշխարհային օրն առաջին անգամ նշվել է Սան Ֆրանցիսկոյում 1983 թվականին: Միջոցառման կազմակերպիչներն այն մարդիկ էին, ում կյանք էր ներխուժել ՄԻԱՎ/ՁԻԱՀ-ը:

Այդ ժամանակից ի վեր ողջ աշխարհում մայիսի երրորդ կիրակին նշվում է որպես ՁԻԱՀ-ից մահացած մարդկանց հիշատակի համաշխարհային օր: Այդ օրը միլիոնավոր մարդիկ հիշում են ՁԻԱՀ-ից մահացած մարդկանց, նաև արտահայտում են իրենց համերաշխությունը ՄԻԱՎ-ով ապրողներին:

ՁԻԱՀ-ից մահացած մարդկանց հիշատակի համաշխարհային օրվա շրջանակներում ողջ աշխարհում անցկացվում են միջոցառումներ, որոնք ուղղված են ՄԻԱՎ/ՁԻԱՀ-ի խնդիրների վրա հասարակության ուշադրությունը սևեռելուն: Այդպիսի միջոցառումներից են մոմավառությունը և «Քվիլթը»: ՁԻԱՀ-ից մահացածների հիշատակին մոմեր վառելու արարողությունն առաջին անգամ տեղի է ունեցել 1983թ., երբ գրանցված էր ՁԻԱՀ-ից մահվան ընդամենը մի քանի հազար դեպք: Արարողությունը կարևոր նշանակություն ունի ՁԻԱՀ-ից մահացածներին հիշելու, ՄԻԱՎ-ով ապրող մարդկանց աջակցություն ցուցաբերելու, ՄԻԱՎ/ՁԻԱՀ-ի վերաբերյալ տեղեկացվածությունը բարձրացնելու և ՄԻԱՎ/ՁԻԱՀ-ին հակազդման մեջ համայնքներին ներգրավելու համար: Այն ստեղծում է համախմբվածություն և գրավում համընդհանուր ուշադրություն: Այս արարողությունը տեղի է ունենում բազմաթիվ երկրներում: Տարբեր համայնքներում այն յուրովի է ընթանում. Մի տեղ կատարվում է ընդամենը մի քանի ընկերների միջավայրում, մեկ այլ տեղ հազարավոր մարդիկ երթի են դուրս գալիս՝ վառվող մոմեր բռնած և հիշատակի երգեր երգելով:

«Քվիլթը» ողջ աշխարհում իրականացվող ՁԻԱՀ-ից մահացածների հիշատակի ամենամեծ հասարակական ծրագիրն է: «Քվիլթ» նշանակում է լաթերից կարված ծածկոց: Ըստ հնում ծագած ավանդույթի՝ ծածկոցը կարել են նրա ընտանիքի անդամները, հարևանները և ծանոթները՝ ի հիշատակ մահացածի: Այդ նպատակով օգտագործվել են բազմագույն լաթեր:

ՄԻԱՎ վարակի համաճարակը նոր հնչեղություն հաղորդեց լաթերից կարվող ծածկոցի ավանդույթին: Առաջին անգամ «Քվիլթը» կարել է Ջոնս Քլիվը, ինչով արտահայտել է ՁԻԱՀ-ից մահացած իր ընկերոջ կորստի ցավը: Միջոցառման նպատակը ՁԻԱՀ-ից մահացածների հիշատակը հավերժացնելն ու համաճարակի կործանարար ազդեցությունը մարդկանց տեսանելի դարձնելն է: «Քվիլթը», որի յուրաքանչյուր կտորը նվիրված է ՁԻԱՀ-ից մահացած մեկ մարդու հիշատակին, հնարավորություն է տալիս պատկերացում կազմելու ՄԻԱՎ վարակի համաճարակի իրական մասշտաբների մասին, գրավում է բազմաթիվ մարդկանց ուշադրությունը, ովքեր երբևէ չեն էլ մտածել ՄԻԱՎ/ՁԻԱՀ-ի մասին՝ կարծելով, թե այդ խնդիրն իրենց չի վերաբերում:

Քանի դեռ ՁԻԱՀ-ը շարունակում է ողջ աշխարհում կյանքեր խլել, «Քվիլթը» մեծանում է՝ իր մեջ ներառելով հիշողություն, հույս և հավատ, որը կօգնի հաղթա-հարելու ՄԻԱՎ/ՁԻԱՀ-ի ազդեցության հետևանքները: