IKEA–ի 4 գլխավոր մենեջերներ աշխատանքից հեռացվել են՝ անձնակազմի անդամներին և ընկերության հաճախորդներին լրտեսելու համար

Կահույքի արտադրության համաշխարհային առաջատար համարվող IKEA ընկերությունն աշխատանքից հեռացրել է Ֆրանսիայի բաժանմունքի 4 գլխավոր մենեջերների, որոնք մեղադրվում են անձնակազմի անդամներին և ընկերության հաճախորդներին լրտեսելու համար։ Այս մասին նշված է IKEA France–ի տարածած մամլո հաղորդագրությունում։

Հաղորդագրությունում նշվում է, որ ընկերությունն աշխատանքից ազատել է նախկին գործադիր տնօրենին, անձնակազմի կառավարման նախկին տնօրենին, նախկին գլխավոր ֆինանսիստին և ռիսկերի կառավարման տնօրենի պաշտոնակատարին։ «IKEA France»–ը չի նշել պաշտոնաթող ղեկավարների անունները։

«IKEA France»–ի գլխավոր մենեջերները լրտեսության մեջ մեղադրվել են այս տարվա փետրվարին։ Canard enchaine երգիծական շաբաթաթերթը գրել էր, որ շվեդական ընկերության ֆրանսիական մասնաճյուղի ղեկավարությունը ապօրինի ճանապարհով ձեռք էր բերել ոստիկանական Stic տեղեկությունների բազան, որի նպատակն է եղել ստուգել ընկերության անձնակազմի և հաճախորդների անձնական տվյալները։ Այդ առիթով հրապարակված Էլեկտրոնային նամակները և տարբեր հրապարակումները կողմնակիորեն փաստում են, որ ընկերության ղեկավարությունը զբաղվել է լրտեսությամբ։