Արծվիկ Մինասյանը Ամուլսարի հետ կապված չի կիսում բնապահպանական ՀԿ-երի մտահոգությունները

«Մեր գլխավոր նպատակը գետերի հզորությունն ու արդյունավետությունը ճիշտ գնահատելն է, ինչպես նաև բնապահպանական տեսակետից ավերումների դեմն առնելը: Անկախ նրանից, թե ում է պատկանում ՀԷԿ-ը, եթե տվյալ ՀԷԿ-ը չի բավարարում բնապահպանական ստանդարտներին, մենք ներկայացնելու ենք միջնորդություն՝ կիրառելու համար համապատասխան պատժամիջոցներ՝ ջրօգտագործման թույլտվության չեղարկում կամ նոր պայմանների առաջադրում հիմնավորմամբ: ԱԺ-ում լրագրողների հետ զրույցում՝ անդրադառնալով վարչապետ Կարեն Կարապետյանի հանձնարարականին, ասաց բնապահպանության նախարար Արծվիկ Մինասյանը:

Հարցին՝ հնարավո՞ր է, որ որոշակի ՀԷԿ-երի գործունեությունը դադարեցվի՝ հաշվի առնելով այն, որ դրանց որոշ սեփականատերեր օլիգարխներ են, նախարարը դժվարացավ պատասխանել, նշելով, որ դրանց օգտագործումը պետք է լինի արդյունավետ և օպտիմալ.

«Մենք չպետք է «հյուծենք» ջուրը և արդյունքում ոչինչ չունենանք: Առայժմ ուսումնասիրումների փուլում է, իրականացվում են ստուգումներ մի քանի այլ ուղղություններով, այդ թվում նաև Շաքիի ջրվեժի մասին, որտեղ կա շատ լուրջ խնդիր, ունենք ստուգումներ բացված ձկնաբուծական մի շարք տնտեսություններում և առհասարակ խորքային հորերի մասով»,- մանրամասնեց նախարարը:

Արծվիկ Մինասյանը համամիտ չէ նաև այն տեսակետի հետ, թե՝ մինչ այս ոլորտում բարձիթողի վիճակ էր: «Չկա որևէ անձ, որը կարող է կամ էլ հնարավորություն ունի հասարակության մեջ ունեցած իր դիրքով ազդել մեր որոշումների կայացման մասով»,- ասաց նա:

Անդրադառնալով Ամուլսարի ծրագրին՝ նորանշանակ նախարարը վստահեցրեց, որ այդ հարցով երեկ քննարկում է եղել, սակայն ինքը՝ որպես բնապահպանության նախարար, այս հարցում որևէ հիմք չի տեսել, որպեսզի կիսի բնապահպանական ՀԿ-ների մտահոգությունները: