Լիտվան ավանդ ունի ԼՂ շուրջ իրավիճակի վատթարացման կանխարգելման գործում

Ձգձգվող հակամարտությունները շարունակում են մնալ ԵԱՀԿ-ի տարածքում անվտանգության գլխավոր սպառնալիքներից մեկը, համոզված է Լիտվայի արտաքին գործերի նախարար Աուդրոնյուս Աժուբալիսը։

«Դրա համար էլ ԵԱՀԿ-ում անցյալ տարի Լիտվայի ներկայացուցչության հիմնական առաջնահերթություններից մեկը եղել է ձգձգվող հակամարտությունների կարգավորման ուղղությամբ կազմակերպության հնարավորությունների բարձրացումը»,- Eurodialogue.org հրատարակությանը ասել է Աժուբալիսը։

Մեկնաբանելով հետխորհրդային տարածքում, հատկապես՝ Հարավային Կովկասի տարածաշրջանում և Կենտրոնական Ասիայում վերջին ժամանակներում լիտվական արտաքին քաղաքականության ակտիվացումը՝ լիտվական ԱԳՆ ղեկավարը նշել է.

«Մենք սերտորեն աշխատել ենք Մինսկի խմբի հետ և ավանդ ենք ներդրել ԼՂ շուրջ իրավիճակի վատթարացման կանխարգելման գործում։ Մինսկի խմբի, Հայաստանի և Ադրբեջանի ԱԳՆ պատվիրակությունների ղեկավարները 2011–ի դեկտեմբերի 6-ին՝ Վիլնյուսի նախարարների խորհրդի շրջանակներում, ընդունել են համատեղ հայտարարություն։ Պատվիրակությունների ղեկավարները համաձայն են խաղաղ կարգավորման ուղղությամբ առաջընթացի հասնելու համար ԵԱՀԿ-ի Մինսկի խմբի ձևաչափում բանակցությունների շարունակման անհրաժեշտության հետ»։