Մաքսայինը «կոտրում է» փոքրերին

Հատկապես վերջին տարիներին աճել էր Վրաստանից տարբեր ապրանքներ ներկրող անհատների թիվը, որոնք հարևան երկրից բերած կարագի, ձեթի ու տնտեսական պարագաների վաճառքի շնորհիվ էին գոյատևում:

Առաջին հայացքից չնչին թվացող եկամուտով (մեկ մարդատար մեքենայով բերված ապրանքից անհատն ունենում էր մոտ 20 հազար դրամ եկամուտ՝ հանած կողմնակի ծախսերը) Հայաստանում մեկ ընտանիք մեկ շաբաթ գոյատևում էր:

Կառավարության փոփոխությունից հետո փոխվել է նաև այս մարդկանց դրությունը:

ԼՈւՐԵՐ.com-ին ահազանգում են, որ հայ-վրացական սահմանին հայ մաքսավորները սկսել են չափից դուրս խիստ հսկողություն իրականացնել՝ օրենքի շրջանակում իբր ստուգելով յուրաքանչյուր իր: Տուփերը բացվում են խիստ անզգուշաբար, կոպիտ դատարկվում են հատակին և շատ դեպքում՝ դառնում անպիտան:

Ստացվում է՝ հիշյալ անձինք ոչ միայն նշված 20 հազար դրամի օգուտը չեն ունենում, այլև հայտնվում են ճանապարհածախսն ու այլ ծախսեր վճարելու խնդրի առաջ:

Մեզ հետ զրույցում մի երիտասարդ գործարար նշեց, որ այս տարիների ընթացքում հասցրել է լավ տեղեկանալ, թե ինչ քանակի ու ինչ տեսակի ապրանք կարող է անվճար ներկրել: Մեկնում են Վրաստան ընտանիքի 4 անդամներով՝ առավելագույնը բերելու համար: Շատ լավ գիտեն՝ որ տուփը քանի կիլոգրամ է կշռում, կամ որ տարայի մեջ քանի լիտր հեղուկ կա, և այդ ամենին՝ է՛լ ավելի քաջատեղյակ են մաքսավորները, այսինքն՝ նոր հեծանիվ պետք չէ հորինել և մի քանի անգամ կշռելու կամ ստուգելու նպատակով տուփերը աջ ու ձախ շպրտել, բացել ու փչացնել ողջ ապրանքը:

Այս փոփոխությունները կատարվել են ՊԵԿ ղեկավարի փոփոխությունից հետո, ով պարբերաբար հայտարարում է, որ զբաղվելու է ստվերի հայտնաբերմամբ և հասնելու է անթերի համակարգ ունենալուն:

Այնինչ, ստվերում գործողներին գտնելու համար բնավ կարիք չկա հատուկ հանձնաժողովներ բացել կամ ծրագրեր մշակել: Այդ անձանց և նրանց ներկրած ապրանքների մասին քաջատեղյակ են նույնիսկ հիշյալ վերավաճառող անհատները, որոնց  խոսքով՝ իրենք բազմիցս են ականատես եղել, թե ինչպես են հսկա մեքենաներ մտնում երկիր՝ առանց ավելորդ քաշքշուկի՝ հենց այն ժամանակ, երբ ստուգում ու քանդում են իրենց տոպրակները:

Հավանաբար, նրանք շարունակում են պարզապես սխտոր կամ մեխ «ներկրել»:

Ինչպես հայտնի է՝ որոշ գործարարների մեքենաների պարունակությունը չի ստուգվում և այն պարզապես երկիր է մտնում նշված կետերից մեկի անվան տակ:

Իսկ ինչու՞ սխտոր կամ մեխ:

Պարզապես՝ դրանք էժան ապրանքներ են և ավելի մատչելի է, օրինակ, սխտորը մաքսազերծել, քան հազար ու մի թանկ ապրանքներ, որոնց կարելի է հանդիպել երկրիս հսկա սուպերմարկետներում կամ էլիտար խանութներում:

Անի Սահակյան