Դպրոցական օլիմպիադայի հաղթողներին պարգևները հանձնել է նախարարը

Երևանի պետական համալսարանում կազմակերպվել էր դպրոցականների հանրապետական օլիմպիադայի հաղթողների պարգևատրման հանդիսավոր միջոցառում, որի ընթացքում ՀՀ կրթության և գիտության նախարար Արմեն Աշոտյանը 66 հաղթողներին անձամբ հանձնել է առաջին կարգի դիպլոմներ:

Նախարարը, ողջունելով օլիմպիադայի բոլոր մասնակիցներին, ընդգծել է, որ օլիմպիական շարժումը Հայաստանում հարուստ ավանդույթներ ունի. «Օլիմպիական շարժումը կարևոր է ոչ միայն հաջողությունների ու հաղթանակների առումով, այլև կրթություն քարոզելու առաջնային նպատակով:

Օլիմպիական շարժման ժամանակ մենք պարտավոր ենք հայտնաբերել տաղանդավոր երեխաներին, ովքեր հետագայում հնարավորություն ստանալով մասնակցել միջազգային օլիմպիադաների, մեր հանապետությունը պատվով են ներկայացնելու միջազգային հարթականերում: Վերջին տարիներին միջազգային օլիմպիադաներից մենք ունենք գոհացուցիչ արդյունքներ՝ մեր աշակերտները փառքով են վերադառնում միջազգային օլիմպիադաներից»,- նշել է նախարարը և հավելել, որ առարկայական օլիմպիադաներ անցկացվում են 15 առարկաներից, որոնցից 6-ի դեպքում են մրցաշարերը շարունակվում միջազգային մրցասպարեզում: «Բայց մեզ համար հայագիտական և հայրենասիրական ուղղվածության օլիմպիադաները ևս խիստ առաջնային են և, թերևս ավելի կարևոր: Խոսքը «Նախնական զինվորական պատրաստություն» և «Հայ եկեղեցու պատմություն» առարկաների օլիմպիադաների մասին է, որոնք օլիմպիադաների ցանկում ներառվել են վերջին տարիներին»,- նշել է նախարարը և հավելել` «Ուզում եմ շնորհավորել և շնորհակալություն հայտնել օլիմպիադայի բոլոր մասնակիցներին: Ուզում եմ գլուխ խոնարհել բոլոր այն մանկավարժների առաջ, ովքեր կրթել են ևս մեկ բանիմաց սերունդ»:

Նախարարը հիշեցրել է, որ միջազգային օլիմպիադաներում հաջողությամբ հանդես եկած երեխաներն առանց քննությունների կարող են ընդունվել ՀՀ ցանկացած բուհ և ընդգծել, որ նախարարությունը միջազգային օլիմպիադաների մասնակիցների թիմ ձևավորելու նպատակով համապատասխան առարկաներից բոլոր հաղթողների համար կազմակերպելու է նախապատրաստական ամառային հավաքներ: Օլիմպիականները հանգստի հետ կհամատեղեն պարապմունքները՝ լավագույն մասնագետները նրանց հետ կպարապեն, և ուժեղագույնները կընտրվեն առարկայական հավաքականի կազմում։

2011-2012 ուսումնական տարվա դպրոցականների առարկայական օլիմպիադային մասնակցել է 1126 աշակերտ՝ Երևանից, մարզերից և ԼՂՀ-ից: Նրանցից 240-ը արժանացել են գովասանագրերի, 141-ը՝ 3-րդ կարգի, 92-ը՝ երկրորդ, իսկ 66-ը՝ առաջին կարգի դիպլոմների:
Դպրոցական առարկայական օլիմպիադայի եզրափակիչ փուլը տեղի է ունեցել մարտի 23-ից մայիսի 16-ը՝ 15 առարկայից՝ «Պատմություն», «Աստղագիտություն», «Հայոց եկեղեցու պատմություն», «Ինֆորմատիկա», «Հայոց լեզու», «Գրականություն», «Աշխարհագրություն», «Ռուսաց լեզու», «Անգլերեն», «Ֆրանսերեն», «Գերմաներեն», «Կենսաբանություն», «Քիմիա», «Ֆիզիկա», «Մաթեմատիկա»: