«Գեղարվեստական կրթության շաբաթ»` մայրաքաղաքում և մարզերում

ՅՈՒՆԵՍԿՕ-ի Գլխավոր կոնֆերանսի 36-րդ նստաշրջանը 2012 թ. սկսած՝ յուրաքանչյուր տարվա մայիս ամսվա չորրորդ շաբաթը հռչակել է «Գեղարվեստական կրթության միջազգային շաբաթ»: Հայաստանը ևս միացել է ՅՈՒՆԵՍԿՕ-ի կոչին և ՀՀ նախագահի տիկին Ռիտա Սարգսյանի բարձր հովանավորությամբ ու ՀՀ մշակույթի նախարարության աջակցությամբ հանրապետությունում մայիսի 21-27-ը կանցկացվեն նպատակային բազմաբնույթ ծրագրեր:

Շաբաթը կդառնա այս ասպարեզում մեր երկրի արձանագրած ձեռքբերումների և իրականացվող ծրագրերի մի յուրահատուկ հանրագումար-ստուգատես, որի ընթացքում մեկ անգամ ևս փաստելով գեղարվեստական կրթության կարևորությունը, հանրությանը կներկայացվի այս ասպարեզում արտերկրի առաջավոր փորձը, ինչպես նաև ոլորտի զարգացմանը նպատակաուղղված այն բոլոր նախաձեռնությունները, որոնք ստեղծվել ու ամրապնդվում են ՀՀ կառավարության, պետական մարմինների և հասարակական կազմակերպությունների ծրագրերով: Ոլորտի զարգացումը ՀՀ մշակույթի նախարարության ծրագրային գերակայություններից է և, բնականաբար, շաբաթվա ընթացքում լայնորեն կներկայացվեն և կլուսաբանվեն նախարարության իրականացրած և ընթացիկ ծրագրերը:

Կարևորելով մատաղ սերնդի աշխարհայացքի ձևավորման գործում գեղարվեստական կրթության նշանակությունը՝ ՀՀ մշակույթի նախարարության կողմից մշակվում է և մինչև ընթացիկ տարվա հունիս ամիսը ՀՀ կառավարություն կներկայացվի «Մա­նուկների և պատանիների գեղարվեստական կրթության և գե­ղագիտական դաստիարակության 2012-2015 թթ. պետական ծրագիրը»: Այս համապարփակ ծրագրի շնորհիվ առաջիկա երեք տարիների ընթացքում կիրականացվեն նպատակային նախագծեր, որոնք ուղղված կլինեն ոլորտի առավել արդյունավետ զարգացմանը: Նախագծի հեղինակները համոզված են, որ մանուկների ու պատանիների համար այսօր կատարված յուրաքանչյուր ներդրում հասցեագրված է ապագային:

«Գեղարվեստական կրթության միջազգային շաբաթ» նախաձեռնությանը նվիրված ասուլիսին մասնակցում են ՀՀ մշակույթի նախարարի տեղակալ Արթուր Պողոսյանը, Մշակութային կրթության հիմնադրամի տնօրեն Նելլի Սարգսյանը, նախարարության ժամանակակից արվեստի վարչության գլխավոր մասնագետ Լիլիա Նիկոյանը: