Զորակոչ չէ, որ ծանուցագիր ուղարկեն. Մուշեղ Աղեկյանը` զորացրված քաղաքացիներին զորամասեր տանելու մասին

Ինչպես հայտնել էր Լուրեր.com–ը, ՀՀ Զինված ուժերում զինվորական ծառայություն կատարած և զորացրված մի շարք քաղաքացիների տարել են տարածքային զինկոմիսարիատներ, այնուհետև` տարբեր զորամասեր: ՊՆ-ից ավելի ուշ տեղեկացրել էին, որ դա պլանային միջոցառում է, և իրականացվում է զինված ուժերի մարտական պատրաստության հանկարծակի ստուգումների պլանի համաձայն: Թե որքա՞ն է ծառայողական գործուղման մեկնած աշխատողների օրապահիկի չափը, Լուրեր.com-ը փորձեց ճշտել ՊՆ լրատվական ծառայության ղեկավար Մուշեղ Աղեկյանից:

«Մեկ օրվա ընթացքում օրապահիկ չի վճարվում: Այդ միջոցառումը մեկօրյա է եղել` չհաշված ճանապարհը»,- ասաց Աղեկյանը և հավելեց, որ սա պլանային միջոցառում է:

Հարցին, թե ի՞նչ պարբերականությամբ են լինում այս ստուգումները, Աղեկյանը դժվարացավ պատասխանել:

«Հստակ բան չկա: Դա մարտական պատրաստվածության հանկարծակի ստուգումների պլանի համաձայն է, և ես չեմ կարող ասել, թե դա ինչ պարբերականությամբ է անցացվում: Նման միջոցառումներ լինում են նաև հրամանատարաշտաբային զորավարժությունների ընթացքում, երբ նախատեսվում է այդ զորակոչային խմբի ներգրավվում»,- ասաց Աղեկյանը:

Անդրադառնալով նաև հարցին, թե զորացրված քաղաքացիներին տարածքային զինկոմիսարիատներ տանելուց ծանուցագիր ներկայացնո՞ւմ են, թե` ոչ, Աղեկյանն ասաց. «Զորակոչ չէ, որ ծանուցագիր ուղարկեն: Բոլոր զինապահ զորքերն ընդգրկված են պահեստազորում: Գնում են նրանք, որոնք կցված են այդ զորամասերին: Դա զինկոմիսարիատների աշխատանքն է և հստակ մշակված է»: