Euronews. Հորդանանի թագավորը կոչ է արել Ասադին հեռանալ

Հորդանանի թագավոր Աբդուլլահ 2-րդն արաբական երկրների առաջնորդներից առաջինն է, ով հրապարակայնորեն կոչ է արել Սիրիայի նախագահ Բաշար ալ-Ասադին հրաժարական տալ: Բրիտանացի լրագրողներին տված հարցազրույցում Հորդանանի թագավորն ընդգծել է, որ Ասադը պետք է հրաժարական տա, սակայն պետք է մասնակցի երկրում քաղաքական համակարգի ռեֆորմներին։ Ընդ որում, Արաբական երկրների լիգայի՝ Սիրիայի անդամակացությունը դադարեցնելու որոշմանը զուգահեռ Արաբական լիգան բանակցություններ է սկսել Սիրիայի ընդդիմության հետ։

Այդ փաստը նունպես բարդացնում է հարաբերությունները Դամասկոսի հետ, քանի որ Սիրիայի իշխանությունները կարծում են, որ Արաբական երկրների լիգայի նման որոշումը չափազանց վտանգավոր քայլ է, որը համաձայնեցվել է ԱՄՆ–ի և Արևմտյան երկրների հետ։ Եվրոպական միությունը որոշել է խստացնել պատժամիջոցները Սիրիայի նկատմամբ: Ընդլայնվել է Սիրիայի պաշտոնատար անձանց «սեւ ցուցակը», ովքեր զրկված են ԵՄ երկրներ մուտքի արտոնագիր ստանալուց, և սառեցվել են եվրոպական բանկերում նրանց հաշիվները։ Սիրիայի իշխանությունները զրկվել են Եվրոպական ներդրումային բանկի հասանելիությունից։ Իսկ Սիրիայի քաղաքներում չեն դադարում ​​բախումները, որոնք ընդդիմությունը եւ արեւմտյան մամուլը կոչում են հակակառավարական ցույցեր։ Սակայն, ըստ պաշտոնական Դամասկոսի,  դրանք ավազակախմբեր են, որոնք հովանավորվում են այլ երկրների կողմից։ Միայն վերջին երկու օրերին տեղի ունեցած լուրջ բախումների ժամանակ սպանվել է ավելի քան քառասուն մարդ: