Թուրքիայի կանաչ անձնագիր ունեցող 43 մարդ ապաստանի խնդրանքով դիմել է Գերմանիային

Թուրքիայում հուլիսին տեղի ունեցած ռազմական հեղաշրջման ձախողված փորձից հետո Գերմանիայի Հյուսիսային Հռենոս-Վեսթֆալիա երկրամասում ապաստան ստանալու դիմում է ներկայացրել թուրքական կանաչ անձնագիր ունեցող 43 մարդ: Այս մասին տեղեկացնում է գերմանական Deutsche Welle-ն:

Rheinische Post պարբերականի տվյալներով' բացի դիվանագետներից և նրանց ընտանիքների անդամներից ապաստան ստանալու դիմում ներկայացրածների շարքում զինվորներ կան:

Գերմանիայի արտգործնախարարությունը որևէ մեկնաբանություն չի տվել այս փաստի առնչությամբ, իսկ Amensty Inetrnational կազմակերպությունը ուշադրություն է հրավիրել այն փաստի վրա, որ քանի դեռ ապաստան տրամադրելու հարցն ընթացակարգի մեջ է, դիմող անձինք Թուրքիա չեն ուղարկվի:

Պարբերականի հետ զրույցի ընթացքում կառավարության ներկայացուցիչը նշել է, որ ապաստան տրամադրելու գործով որոշում կայացնելը բարդ է լինելու: «Նրանք չեն կարող ուղարկվել Թուրքիա' հաշվի առնելով, թե ինչ է նրանց այնտեղ սպասվում: Սակայն եթե թույլ տանք, որ այստեղ մնան, Թուրքիայի հետ առանց այն էլ լարված հարաբերություններն ավելի կվնասվեն»,- նշել է նա:

Թուրքիայի կանաչ անձնագիրը այլ կերպ կոչվում է նաև հատուկ անձնագիր: Այն տրամադրվում է մեջլիսի նախկին անդամներին, առաջին, երկրորդ կամ երրորդ դասի պետական ծառայողներին, թոշակի անցած առաջին, երկրորդ կամ երրորդ դասի պետական ծառայողներին, քաղաքապետերին, կանաչ անձնագիր կրողնե րի ամուսիններին կամ կանանց, նրանց երեխաներին, ովքեր ամուսնացած չեն և ում տարիքը չի գերազանցում 25-ը: