Իմ և Արմեն Աշոտյանի միջև ստեղծված իրավիճակը փորձ է արվել քաղաքականացնել. Սուրեն Զոլյան

ԵՊԼՀ նախկին ռեկտոր Սուրեն Զոլյանի և ԿԳ նախարար Արմեն Աշոտյանի միջև ստեղծված իրավիճակը փորձ է արվել քաղաքականացնել, սակայն դա տեղի չունեցավ: Այս մասին այսօր, լրագրողների հետ հանդիպման ժամանակ ասաց ինքը՝ Զոլյանը:

Նրա խոսքերով, առաջին նկատողությունն իրեն տրվել է Եվրախորհրդի կոմիտեի նիստին մասնակցելու ժամանակ եռօրյա բացակայության համար, այն դեպքում, երբ իրեն որպես փորձագետ այդ նիստին մասնակցելու է ներկայացրել ՀՀ-ն, և խարտիան հատուկ նշում է, որ փորձագետի վրա իրավունք չունեն ազդեցություն ունենալ և խառնվել նրա գործերին, ուստի անհիմն էր բացակայությունն անհարգելի համարելը:

Խոսելով երկրորդ նկատողության մասին՝ Զոլյանն ասաց, որ երբ մեկնել է Ստրասբուրգ, անմիջապես ստուգում է նշանակվել, որպեսզի երկրորդ նկատողությունը տրվի:

«Ավելի ուշ պարզվեց, որ տվել եմ գոյություն չունեցող դիպլոմներ: Սակայն առկա են ստուգումների վերաբերյալ օրենքների խախտումներ: Համալսարանի բոլոր գիտխորհուրդները որոշում են կայացրել դիմել դատարան, որպեսզի համալսարանի բարի համբավը վերականգնվի և ակտը չեղյալ համարվի, այլ ոչ թե բանդիտները մտնեն համալսարան և ստուգումներ անեն»,- նշեց Զոլյանը:

Վերջինս նշեց, որ ունեն տրված մասնագիտությունների լիցենզիան. «Եթե նախարարության աշխատակիցները չգիտեն, չի նշանակում, որ այդ մասնագիտությունները չեն եղել: Եթե տարիներ շարունակ ես գոյություն չունեցող մասնագիտությունների համար տվել եմ դիպլոմներ, պետք է դիմեին դատախազություն, իսկ դրա վերբերյալ հայցադիմում չի եղել», - նշեց նախկին ռեկտորը: