Ո՞վքեր են 2013-ի նախագահական ընտրություններին առաջադրվող թեկնածուները

2013թ.–ի նախագահական ընտրություններին իրենց թեկնածությունը առաջադրելու մասին արդեն հայտնել են մի շարք քաղաքական գործիչներ։ 

Դրանց թվում են Ազգային ինքնորոշում միության նախագահ Պարույր Հայրիկյանը։ Իր վերջին ասուլիսում «ազգային մեծագույն երևույթը» (ինչպես ինքն էր իրեն անվանում) կարծիք հայտնեց, որ իրավունք չունի չառաջադրվել նախագահական ընտրություններում, քանի որ «պարտք ունի կատարելու»:

Իր մասնակցությունը նախագահական ընտրություններին ազգի համար բախտորոշ «պատմական անհրաժեշտություն» է համարում նաև երկրի գլխավոր մարքսիստ, Մարքսիստական կուսակցության նախագահ Դավիթ Հակոբյանը, որն այսօր «գաղափարական կապիտալի, վարդապետության առումով իրեն ալտերնատիվ չի տեսնում»: Հակոբյանը չի հուսահատվում պառլամենտական մեծամասնության՝ այլ թեկնածուի սատարելուց, քանի որ, նրա համոզմամբ, նոր նախագահը պառլամենտը կցրի և «կձևավորի իսկական, գաղափարական պառլամենտ»:

Իսկ Հայրիկյանը այս հարցի առնչությամբ կարծում է, որ ՀՀ Սահմանադրության համաձայն՝ պառլամենտը ցրելու համար պետք է հիմքեր լինեն, որոնք այսօր բացակայում են։ 

Թեկնածուների շարքում է նաև «Նոր ժամանակներ» կուսակցության նախագահ Արամ Կարապետյանը, ով նույնպես հայտարարել է 2013թ.–ի նախագահական ընտրություններին իր մասնակցության մասին։ «Նորմալ նախագահի ինչի՞ն է պետք խորհրդարանը, եթե նորմալ նախագահն ուզում է իրավիճակ փոխել, պետք է ցրի այն խորհրդարանը, որը ժողովրդի քվեով չի ընտրվել», – խորհրդարանը ցրելու վերաբերյալ կարծիք է հայտնել Կարապետյանը։

2013-ի ընտրություններին ներկայացված կլինի նաև «Ժողովրդական կուսակցության» նախագահ Տիգրան Կարապետյանը։ Այդ մասին նա հայտարարել է դեռևս խորհրդարանական ընտրություններից առաջ։ Իսկ ընտրություններից հետո արդեն Կարապետյանը լրատվամիջոցներից մեկի հետ զրույցում հաստատել է, որ կմասնակցի ընտրություններին, բայց դեռ չի որոշել, թե ինչ կարգավիճակով կմասնակցի։ 

Նախագահական ընտրություններին Հայ հեղափոխական դաշանկցությունը ներկայցնող թեկնածուն դեռ որոշված չէ. հարցի վերաբերյալ կուսակցության ներսում դեռ քննարկումներ են գնում։ ՀՅԴ բյուրոյի անդամ Վահան Հովհաննիսյանի համոզմամբ՝  նման հայտարարությունները այս պահին դեռ վաղ է անել: 

«Ժառանգություն» կուսակցության առաջնորդ Րաֆֆի Հովհաննիսյանը դեռևս խորհրդարանական ընտրություններից առաջ հայտարարել է նախագահական ընտրություններին մասնակցելու որոշման մասին։ «Եթե Հայաստանի սերունդը առաջ բերի նոր այլընտրանք, նրան կսատարեմ իբրև ավագ քաղաքացի, հակառակ դեպքում ես նախագահական ընտրություններում կառաջադրեմ իմ թեկնածությունը՝ որպես պահեստային տարբերակ», – «100 հարց, 100 պատասխան» խորագիրը կրող քննարկման ժամանակ նշել է նա։ Մայիսի 19-ի մամլո ասուլիսի ընթացքում, սակայն, Հովհաննիսյանը  հավանական չի համարել, որ կարող է դառնալ Հայաստանի չորրորդ նախագահը: Նա նշել է, որ իր համար գլխավորը Հայաստանի առաջընթացն է, այն որ երկիրը դառնա իրավական պետություն: «Դրա համար ես պատրաստ եմ իմ թեկնածությունն առավել կամ պակաս հավանական դարձնել»,- հավելել է նա: Հիշեցնենք, որ 2008թ.–ի նախագահական ընտրություններում «Ժառանգություն» կուսակցությունը սատարում էր Լևոն Տեր–Պետրոսյանի թեկնածությանը։

Ինչ վերաբերում է Հայ ազգային կոնգրեսի առաջնորդի մասնակցությանՆ առաջիկա նախագահական ընտրություններին, դա քաղաքական դաշտում  կասկածի տեղիք է տալիս։ Լրատվամիջոցներից մեկի հետ զրույցում ՀԱԿ համակարգող Լևոն Զուրաբյանը կարծիք էր հայտնել, որ «Լեւոն Տեր-Պետրոսյանից լավ նախագահի թեկնածու Հայ ազգային կոնգրեսը չունի»։ Բայց պաշտոնական հայտարարություն առաջին նախագահի առաջադրվելու վերաբերյալ դեռ չի եղել։ Նշենք, որ մայիսի 8–ին Ազատության հրապարակում տեղի ունեցած հանրահավաքի ընթացքում Տեր—Պետրոսյանը հայտարարել է. «Կոնգրեսի կազմում ես շարունակելու եմ անել ամեն ինչ՝ հայ ժողովրդին քոչարյանա-սերժական չարագործ ավազակախմբից ազատելու համար։ Եւ պայքարելու եմ այնքան ժամանակ, որքան կներեն իմ ֆիզիկական ուժերը եւ որքան իմ ծառայությունը պահանջված կլինի ժողովրդի կողմից»։

Կոալիցիոն ուժերից «Օրինաց երկիր» կուսակցության փոխնախագահ Մհեր Շահգելդյանը լրատվամիջոցներից մեկի հետ զրույցում երեկ հայտարարել է, որ «կոալիցիոն գործընկերությունը շարունակվել և շարունակվելու է այն համաձայնագրի ոգով, որը 2008 թվականին ձևավորվել է ՀՀԿ–ի և ՕԵԿ–ի միջև»։ Հիշեցնենք, որ 2008–ի կոալիցոն հուշագրում ամրագրված է 2013–ի նախագահական ընտրություններում Սերժ Սարգսյանի թեկնածությունը սատարելու դրույթը։ Հուշագիրը դեռևս ուժի մեջ է, ինչից հետևում է, որ ՕԵԿ–ը նախագահական ընտրություններին սատարելու է գործող նախագահին։ 

Կոալիցիոն մյուս ուժի՝ ԲՀԿ–ի՝ այս կամ այն թեկնածուին սատարելու խնդիրը կարծես թե արդեն պարզ է՝ հաշվի առնելով վերոնշյալ հուշագրի առկայությունը, որն իր ստորագրությամբ վավերացրել է նաև «Բարգավաճ Հայաստան»-ի առաջնորդ Գագիկ Ծառուկյանը։ Նոր հուշագիր կնքելու վերաբերյալ դեռ որևէ պաշտոնական հայտարարություն չկա։

Ավելորդ չենք համարում նաև նշել, որ ԲՀԿ անդամ, ՀՀ նախկին արտգործնախարար Վարդան Օսկանյանը թուրքական լրատվամիջոցների հետ զրույցում բացառել էր իր առաջադրումը նախագահական ընտրություններում։ Միևնույն ժամանակ միասնական շտաբի մայիսի 11–ի նիստի ժամանակ Օսկանյանը, պատասխանելով լրագրողների հարցերին, նշել է, որ առայժմ վաղ է մտածել 2013թ. նախագահական ընտրությունների մասին։ «Այդ հարցն ինձ բազմիցս են տվել, եւ ես միևնույն պատասխանն եմ տալիս: Առայժմ չեմ մտածում այդ թեմայի շուրջ, դեռ վաղ է: Որոշներն այդ պատասխանը մեկնաբանում են, թե ես չեմ բացառել իմ մասնակցությունը, մյուսները թե՝ բացառել եմ», – նշել է նա։