«Դվին. մայրաքաղաք Եվրոպայի և Ասիայի միջև» ցուցահանդես Հռոմում

ՀՀ մշակույթի նախարարության նախաձեռնությամբ` Հայաստանի պատմության թանգարանը Հռոմի Բրասկի թանգարանում ներկայացնում է «Դվին. մայրաքաղաք Եվրոպայի և Ասիայի միջև» անունը կրող ցուցահանդեսը, որի բացումը կայացել է սույն թվականի նոյեմբերի 8-ին:

Ցուցահանդեսը ներառված է Հռոմ քաղաքի Մշակութային ժառանգության գերատեսչության կազմակերպած «Մետաքսի ճանապարհ» մշակութային խոշոր ձեռնարկի շրջանակներում, որի մասնակիցները դեռևս վաղ միջնադարում սկիզբ առած այս լեգենդար ճանապարհին երբևէ գտնված երկրներն են` Չինաստանից մինչև Եվրոպա:

Հայաստանը ներկայանում է իր նշանավոր մայրաքաղաքներով, հատկապես` Դվին և Անի քաղաքներով, որոնք «Մետաքսի ճանապարհի» հանգրվաններից էին և թե' անտիկ շրջանում, թե' միջնադարում ունեին մշակութային, առևտրական, տնտեսական սերտ հարաբերություններ Արևմուտքի և Արևելքի երկրների հետ:

Ցուցադրությունում ներկայացված են.

• VII դարի հայկական քանդակագործության և ճարտարապետության բացառիկ նմուշներ

• V - X դարերի զարդեր, եկեղեցական ծիսական առարկաներ (խաչեր, բուրվառներ և այլ պարագաներ)

• IX - XIII դարերի ջրաներկված խեցեղեն, հախճապակի

• XV - XVI դարերի եկեղեցական ծիսական վարագույրներ, վակասներ և այլն

• VI - XIV դարերի դրամներ` հայտնաբերված Դվինի և Անիի պեղումների ընթացքում (բյուզանդական, արաբական, սելջուկյան, մոնղոլական, պոնտական, հրեական և բոսպորյան վրացական, հայկական):

Ցուցահանդեսը կգործի 2011 թ.-ի նոյեմբերի 8-ից մինչև 2012 թ.-ի հունվարի 29-ը: