Վահան Հովհաննիսյանը հակված չէ կարևորելու ՆԱՏՕ-ի գագաթնաժողովին նախագահի չմասնակցելը

ՀՅԴ գերագույն մարմնի ներկայացուցիչ, Աժ արտաքին հարաբերությունների մշտական հանձնաժողովի անդամ Վահան Հովհաննիսյանն ընդհանուր առմամբ բացասական է գնահատում մայիսի 20, 21–ին Չիկագոյում անցկացված ՆԱՏՕ–ի գագաթնաժողովին Սերժ Սարգսյանի չմասնակցելը։ Նա դժվարեցավ պատասխանել՝ ուներ նախագահի բոյկոտի համար հիմք, թե՝ ոչ։

«Հենց դա չգիտեմ, դրա համար էլ դժվարանում եմ պատասխանել, քանի որ այն, ինչ ես ընթերցեցի՝ ՆԱՏՕ–ի հռչակագիր էր կամ ինչ–որ փաստաթուղթ էր, որն ընդունվել էր, նման բաներ ուրիշ փաստաթղթերում էլ են հաճախ հնչել։ Այսինքն՝ իրական պատճառն այդ փաստաթուղթն էր, թե՝ ոչ, ես չգիտեմ։ Այդ պատճառով մեկնաբանություններից զերծ եմ մնում», – Լուրեր.com–ի հետ զրույցում նշեց նա։

Իսկ թե ինչ հետևանքներ կարող է ունենալ գագաթնաժողովին չմասնակցելը Հայաստանի համար, ՀՅԴ ներկայացուցիչը չցանկացավ մեկնաբանել, միայն նշեց. «լավ չի՝ ընդհանուր առմամբ»։

Անդրադառնալով այն հարցին, թե ինչ կարող էր մեզ տալ մասնակցությունը, Վահան Հովհաննիսյանը նշեց, որ առանձնապես որևէ բան կարող էր և չտալ, բայց առնվազն հնարավորություն կբացեր հանդիպումների մեջ հայկական տեսակետը ավելի ծանրակշիռ կերպով ներկայացնելու։

«Բայց ընդհանրապես այս պահին ես այս հարցը կարևորել հակված չեմ», – եզրափակեց նա։ 

Հիշեցնենք, որ ՀՀ ԱԳ նախարարության տարածած հաղորդագրության մեջ որպես գագաթնաժողովին չմասնակցելու հիմնավորում նշվում էր. «ՆԱՏՕ-ի Չիկագոյի համաժողովի հռչակագրի նախագծում ներառված է Հարավային Կովկասում և Մոլդովայում հակամարտությունների լուծման վերաբերյալ ընդհանրական ձևակերպում, որը, չնայած Լիսաբոնյան հռչակագրի համեմատությամբ որոշակի փոփոխության, հակասում է ղարաբաղյան հիմնախնդրի կարգավորման միջազգային միջնորդական մանդատ ունեցող Մինսկի խմբի համանախագահների մոտեցումներին, որոնք բազմիցս արտահայտվել են Միացյալ Նահանգների, Ռուսաստանի եւ Ֆրանսիայի նախագահների կողմից: Այդ ձևակերպումը չի համապատասխանում ԵԱՀԿ շրջանակներում հիմնախնդրի կարգավորման վերաբերյալ վերջին տարիներին ընդունված հայտարարություններին և որոշումներին: Դա կարող է ոչ միայն վնաս հասցնել Լեռնային Ղարաբաղի հիմնախնդրի կարգավորման բանակցային գործընթացին, այլև վտանգել փխրուն իրավիճակը տարածաշրջանում՝ հատկապես Ադրբեջանի ռազմական ծախսերի աննախադեպ աճի և նրա ղեկավարության ռազմատենչ հռետորաբանության ֆոնի վրա:

Հաշվի առնելով այս մտահոգությունը՝ Հայաստանի Հանրապետության Նախագահը որոշում է կայացրել չմասնակցել Չիկագոյի հանդիպմանը»։