Այս անգամ Ադրբեջանն է նետվում համանախագահների գիրկը

Ինչ-որ բան Ադրբեջանի ղեկավարությանը շտապեցնում է։ Ալիեւի իշխանությունը փորձում է՝ օր առաջ փոխել հակամարտության կարգավորման գործընթացում հաստատված ստատուս քվոն։ Ընդ որում՝ Բաքուն դրան դիմում է թե ռազմական արկածախնդրությունների միջոցով եւ թե դիվանագիտական խողովակներով։ Ադրբեջանի նախագահը նույնիսկ գործածում է մի հնարք, որն այնքան էլ ընդունելի չէ ժամանակակից դիվանագիտության մեջ։ Ալիեւն ակնհայտորեն քծնում է Վլադիմիր Պուտինին, վերջին հեռախոսազրույցից հետո՝ նաեւ Դոնալդ Թրամփին։

Ընդ որում, եթե հավատանք ամերիկացի համանախագահ Ջեյմս Ուորլիքի գրառմանն, Ալիեւը միջնորդների տարածաշրջանային վերջին այցելության ժամանակ նույնիսկ պատրաստակամություն է հայտնել՝ հանդիպել Սերժ Սարգսյանի հետ։ Սակայն Հայաստանի իշխանություններն, որոնք ապրիլյան պատերազմից հետո ակնհայտորեն կոշտացել են իրենց դիրքորոշումը, ըստ էության մերժեցին երկկողմ հանդիպումների հնարավորությունը՝ թե նախագահների եւ թե ԱԳ նախարների մակարդակով։

Տեսանելի է, որ Երեւանի վերապահումներն արժանացել են ԵԱՀԿ Մինսկի խմբի համանախագահների ըմբռնումին։
Նախ արձանագրենք, որ կարգավորման գործընթացի այս փուլում՝ միջնորդական ակտիվությամբ աչքի է ընկնում Ֆրանսիան՝ ըստ ամենայնի նպատակ ունենալով, տեսանելի ապագայում, այնուամենայնիվ, կազմակերպել Սարգսյան-Ալիեւ փարզյան հանդիպում։ Սակայն սա ընդամենը կանխատեսում է կամ պաշտոնական Փարիզի ցանկություն արձանագրում։ Իսկ առայժմ Ֆրանսիայի ԱԳ նախարար Ժան-Մարկ Էրոն կենտրոնացած է Հայաստանի եւ Ադրբեջանի արտգործնախարարների հանդիպման կազմակերպման վրա։ Ֆրանսիական դիվանագիտության ղեկավարն ուրբաթ օրը ԼՂ խնդիրը քննարկել է ռուսաստանցի իր գործընկեր Սերգեյ Լավրովի հետ հեռախոսազրույցի ժամանակ, ապա ընդունել է Ադրբեջանի ԱԳ նախարար Էլմար Մամեդյարովին։ Ադրբեջանցի նախարարն ընդունել է Ֆրանսիայի առաջարկը՝ դեկտեմբերի 8-ին Համբուրգում ԵԱՀԿ անդամ երկրների արտգործնախարարների խորհրդի նիստի շրջանակում կազմակերպել արտաքին քաղաքական գերատեսչությունների ղեկավարների 2+3 ձևաչափով հանդիպում:

Պաշտոնական Երեւանի արձագանքը դեռեւս անհայտ է, սակայն, կարելի է ենթադրել, որ Նալբանդյանը նույնպես կընդունի ֆրանսիացի գործընկերոջ առաջարկությունը։ Արձանագրենք, որ այս անգամ միջնորդներն ընդառաջեցին Հայաստանի պահանջին եւ գնացին ոչ թե արտգործնախարարների երկկողմ, այլ՝ 2+3 ձեւաչափով հանդիպման կազմակերպմանը։

Նալբանդյան-Մամեդյարով հանդիպմանը՝ Ռուսաստանի, Ֆրանսիայի եւ ԱՄՆ արտգործնախարարների ներկայությունը, միայն մեծացնում է դրանում ձեռք բերված հնարավոր պայմանավորվածությունների կատարման հավանականությունը։ Բաքուն առաջիկա հանդիպումը փորձելու է օգտագործել՝ կարգավորման բովանդակային քննարկումներ օրակարգ բերելու նպատակով։ Կարեւոր է, որ Հայաստանը թելադրող լինի նաեւ Համբուրգի հանդիպման բովանդակության հարցում՝ օրակարգ բերելով Վիեննայի պայմանավորվածություններն Ադրբեջանի կողմից կատարելու անհրաժեշտությունը։

Սարգիս Հակոբյան