«Սուլիկո» անսամբլի համերգը «Ազգային Պատկերասրահ» միջազգային երաժշտական 8-րդ փառատոնի շրջանակներում

«Արվեստների Պատկերասրահ» մշակութային հիմնադրամը ՀՀ մշակույթի նախարարության աջակցությամբ և Հայաստանի առաջատար բջջային օպերատոր «ՎիվաՍել-ՄՏՍ» ընկերության գլխավոր հովանավորությամբ ապրիլի 28-ից մայիսի 26-ը ներկայացնում է «Ազգային Պատկերասրահ» միջազգային երաժշտական ութերորդ փառատոնը, որի շրջանակներում ս. թ. մայիսի 22-ին՝ ժամը 19.00-ին, Կոմիտասի անվան կամերային երաժշտության տանը տեղի կունենա Թբիլիսիի օպերային թատրոնի մեներգիչների «Սուլիկո» անսամբլի համերգը: Ծրագրում ընդգրկված են արևմտաեվրոպական, ինչպես նաև վրաց կոմպոզիտորների դասական ստեղծագործություններից: Կկատարվեն նաև վրացական ժողովրդական, հոգևոր, քաղաքային երգեր:

«Սուլիկո» անսամբլը հիմնադրվել է 2007 թ.՝ Վանո Գալուաշվիլու և Կախաբեր Օնաշվիլու կողմից: Անսամբլի մասնակիցները Թբիլիսիի օպերային ճանաչված մեներգիչներ են. Թամազ Սագինաձեն (տենոր), Շալվա Աբրամիշվիլին (տենոր, վրաց. ժող. գործիք ֆանդուրի), Գեորգի Մախարաձեն (բարիտոն, վրաց. ժող. գործիք բաս-ֆանդուրի), Սուլխան Գվելեսիանին (բարիտոն), Վանո Գալուշվիլին (բաս-բարիտոն), Գելա Չախվաձեն (բաս), Դավիթ Կիպիանին (վրաց. ժող. գործիք սալամուրի), Կախաբեր Օնաշվիլին (գեղարվեստական ղեկավար): Անսամբլը հաճախակի ելույթներ է ունենում այնպիսի հեղինակավոր միջազգային փառատոներում, ինչպիսիք են «Էյլաթը»(Իսրայել), «Ուղղափառ երգեցողության փառատոնը» (Էստոնիա), «Համմամեդը» (Թունիս): Համերգային շրջագայություններով ելույթներ են ունեցել Լատվիայում, Լեհաստանում, Ֆրանսիայում, Գերմանիայում, Շվեյցարիայում և այլուր:

«Ազգային պատկերասրահ» միջազգային երաժշտական ութերորդ փառատոնի շրջանակներում կայանալիք այսօրվա համերգը «Սուլիկո» անսամբլի առաջին բեմելն է Հայաստանում: