Ռիսկերն այլևս նվազեցված են

Վարչապետ Կարեն Կարապետյանը, և ևս երկու նախարար՝ հայտ են ներկայացրել՝ անդամագրվելու ՀՀԿ-ին: Թե ինչ խնդիր է լուծում Հանրապետականը՝ վարչապետին և նախարարներին հանրապետական դարձնելով,  ԼՈՒՐԵՐ.com-ը փորձեց պարզել «Միջազգային և անվտանգության հարցերի հայկական ինստիտուտ»-ի հիմնադիր-նախագահ, քաղաքական վերլուծաբան Ստյոպա Սաֆարյանից:

«Անկախ ամեն ինչից, բոլորի համար պարզ է, որ սա Հանրապետական կուսակցության կառավարությունն է: Առջեւում խորհրդարանական ընտրություններ կան, Հանրապետականը մտածում է, որ անբնական կդիտվի, եթե այս նույն թիմը, անգամ մասնակի փոփոխություններով, մնա խորհրդարանական ընտրություններից հետո: Ստացվում է, որ հանրապետական կուսակցությունն ամենամեծ կուսակցությունն է մարդաքանակով, բայց իր նախարարներն անկուսակցական են: Թերևս ՀՀԿ-ն ուզում է ցույց տալ, որ այս կառավարությունը պատկանում է իրեն և ամենակարևոր հանգամանքը վարչապետի հանրապետական դառնալն է, որովհետև, եկեք հասկանանք, որ 2017թ.-ին Սերժ Սարգսյանը եթե անգամ ցանկություն ունենա վերադառնալու վարչապետի պաշտոնին, չի անի դա, որովհետև  դեռևս գործող նախագահ է լինելու: Դրա համար՝ պետք է ինչ-որ մեկը, որը մինչև 2018թ.-ը տեղապահ կլինի այդ պաշտոնին և, հետևաբար, այս առումով՝ որպես երաշխիք, նա պիտի լինի հանրապետական կուսակցությունից, և ավելին. քանի որ խորհրդարանական ընտրություններից հետո ինչ-որ մեկը պետք է գլխավորի կառավարությունը և տարօրինակ կլինի, եթե այդ գլխավորողը՝ առաջին հորիզոնական զբաղեցնող անձը, անկուսակցական  լինի և կապ չունենա հանրապետական կուսակցության հետ»,- ասաց Սաֆարյանը:

Վերջինս նշեց, որ քանի որ հանրապետական կուսակցությանը հաջողվել է հասարակության մոտ գոնե հույսեր և սպասումենր առաջացնել, բնականաբար, կառավարության անդամները նույնպես կլինեն առաջատար դիրքերում, որպես՝ այսպես ասած՝ սպասումների և հույսերի իրականացնող:

«Եթե նրանք չլինեն ցուցակում, կնշանակի ինչ-որ հույսեր պետք չի կապել: Նրանք ժամանակավոր կառավարություն են: Եվ, հետևաբար, լուծումը դառնում է այն, որ «հանրային  սպասումների մարմնացումները» պետք է լինեն ցուցակի առաջին հորիզոնականներում, ցույց տալու  համար հանրությանը, որ փոփոխությունները լինելու են, և այս կառավարությունը ժամանակավոր չէ:

Երկրորդ, որ այս փոփոխությունները հանրապետական կուսակցության փոփոխություններն են, և ահա՛, առաջին հորիզոնականում հանրապետական վարչապետ թեկնածուն է: Այս փոփոխությունները կլինեն նաև խորհրդարանական ընտրություններից հետո: Հետևաբար, Հանրապետական կուսակցության տեսանկյունից հասկանալի է դառնում, թե ինչու պետք է նախարարները դառնան հանրապետական: Ի՞նչ կլինի 2018թ.-ից հետո՝ դեռևս դժվար է ասելը, բայց,  համենայնդեպս, Սերժ Սարգսյանի խնդիրն է՝ մինչեւ 2018թ.-ն այս պաշտոնը պահել և ցանկության դեպքում ստանալ նրանից, ումից հնարավոր է ստանալ, նրանից ով լուրջ քաղաքական հենարան չունի: Կարեն Կարապետյանն այդպիսինն է: Կարեն Կարապետյանն ավելի շատ հանրապետական կուսակցության կողմից վարձված մենեջեր է, և ոչ թե հանրապետական կուսակցության մեջ արմատներ ունեցող մեկը, հետևաբար, կարծես թե բոլոր ռիսկերը նվազեցված են և այն խնդիրները, որ կան, լուծվում են՝ վարչապետին և նախարարներին հանրապետական դարձնելով»,- ասաց Սաֆարյանը:

Գ. Հ.